सागर निकवाडे 
नंदुरबार : गावचा विकास करण्यावरून आरोप प्रत्यारोप केले जात असतात. यातून वाद निर्माण होत असतात. असाच प्रकार नंदुरबार जिल्ह्यात समोर आला असून विकास कामांवरून गावातील दोन गट आमनेसामने आल्याचे पाहण्यास मिळाले. वाद पोलीस स्टेशनमध्ये पोहोचल्यानंतर याठिकाणी देखील दोन्ही गटांमध्ये वाद निर्माण झाल्याचे पाहण्यास मिळाले.  

नंदुरबार तालुक्यातील गुजर भवाली या गावातल्या विकास कामावरुन वाद निर्माण झाला आहे. या गावात सुरु असलेल्या विविध कामांमध्ये भ्रष्ट्राचाराचा आरोप एका गटाकडून करण्यात येत होता. यासाठी त्यांनी आज पंचायत समिती नंदुरबारला घेराव आंदोलन घालण्याचा इशारा दिला होता. मात्र गावातील सत्ताधारी गट देखील पंचायत समितीमध्ये पोहचत त्यांनी गट विकास विकास अधिकाऱ्यांसमोर ठाण मांडून गावातील विकास कामात मुद्दाम रोडे आणले जात असल्याची तक्रार केली. 

दोन्ही गट पोलीस स्टेशनमध्ये पोहचले 

दरम्यान पंचायत समितीमध्ये दोन्ही गट समोरासमोर आल्याने वाद निर्माण झाला होता. यानंतर हा वाद पोलीस स्टेशनमध्ये पोहचला. याठिकाणी देखील दोन्ही गट समोरा समोर आल्याने काही काळ तणाव निर्माण झाला होता. पोलीसांनी वेळीच हस्तक्षेप करत एका गटाला बाहेर काढले. तर दुसऱ्या गटाने ठाण मांडत आपली तक्रार पोलिसात केली.  

पोलीस स्टेशन आवारात गोंधळ 

या सगळ्या प्रकारानंतर शहरातील मध्यवर्ती भाग असलेल्या पंचायत समिती आणि शहर पोलीस स्टेशन आवारात अभुतपुर्व गोंधळ पहावयास मिळाला. या प्रकारानंतर संबंधीत तक्रारीची चौकशी करण्याचे आश्वासन गटविकास अधिकारी यांनी दिले आहे. यानंतर गोंधळ कमी झाला आहे. मात्र विकास कामासाठी होणार वाद थांबणार कि पुन्हा उद्भवणार हे पाहणे महत्वाचे आहे.