नंदुरबार : बेरोजगार असलेल्या तरुणांना हेरून नोकरीचे आमिष दाखवत फसवणूक केल्याचे प्रकार अनेकदा समोर आले आहेत. असाच प्रकार (Nandurbar) नंदुरबारमध्ये समोर आला असून या प्रकरणात परदेशात नोकरी लावून देण्याचे आमिष दाखवून तब्बल १० लाख रुपयांत फसवणूक करण्यात आली आहे. 

नंदुरबार शहरातील अल्तमश अबुल्हासात पीरजादा यांची फसवणूक (Fraud) झाली आहे. पीरजादा यांची सुरत (Surat) येथील रहिवासी किस्मत बलराज सोनी व कपिल बलराज सोनी यांच्याशी ओळख होती. या ओळखीतून पीरजादा यांच्या नातेवाईकांना परदेशात नोकरीला लावून देण्याचे आमिष दाखविले. याकरिता काही रक्कमेची मागणी केली. असे करत दोन्ही भावंडांनी पीरजादा यांच्याकडून दहा लाख १४ हजार रुपये उकळून घेतले. 

दरम्यान पैसे घेऊन देखील दोघा भावंडांनी ना युवकांना नोकरी लावली नाही. शिवाय दिलेले पैसे देखील परत केले नाही. त्यामुळे नोकरीच्या आमिषाने पैसे उकळून फसवणूक केल्याचे निदर्शनास आले. त्यामुळे अल्तमश अबुल्हासात पीरजादा यांनी नंदुरबार पोलिसांत फिर्याद दिली. त्यावरून दोन्ही सोनी बंधूंविरुद्ध गुन्हा दाखल करण्यात आला.