नंदुरबारच्या नवापूर बस स्थानकात एक भीषण अपघात घडला आहे. बस बस्थानकात लावताना चालकाने बस पाठीमागे घेतली. यावेळी प्लॅटफॉर्मवर बसलेल्या महिलेला आणि तिच्या नातीला जोरदार धडक दिली. या भीषण अपघातात एका निष्पाप महिलेचा दुर्दैवी मृत्यू झाला, तर तिची नातं गंभीर जखमी झाली. जखमी मुलीवर जवळच्या रुग्णालयात उपचार सुरु आहेत. दरम्यान या घटनेने परिसरात काही काळ गोंधळाचे वातावरण निर्माण झाले होते. या घटनेमुळे परिवहन व्यवस्थेच्या सुरक्षिततेवर गंभीर प्रश्नचिन्ह निर्माण झाले आहे.

मिळालेल्या माहितीनुसार, ५० वर्षीय महिला कमूबाई गोठारिया गावीत आणि त्यांची १५ वर्षाची नात नितीक्षा वळवी या दोघी नवापूर बस स्थानकात बसची वाट पाहत बसल्या होत्या. याच दरम्यान शहादा आगाराची शहादा-सुरत मार्गावरील बस ही स्थानकात लावताना चालकाने बस पाठीमागे घेतली. यावेळी प्लॅटफॉर्मवर बसलेल्या कमूबाई आणि त्यांची नातं नितीक्षा यांना बसची जोरदार धडक बसली.

या अपघातात कमूबाई आणि त्यांची नातं गंभीर जखमी झाल्या. स्थानिक नागरिकांनी तातडीने त्यांना उपजिल्हा रुग्णालयात दाखल केले, मात्र उपचार सुरू असतानाच कमूबाई यांचा मृत्यू झाला. तसेच नितीक्षा हीच्यावर उपचार सुरू आहेत. या घटनेनंतर बस स्थानक परिसरात मोठा गोंधळ उडाला. संतप्त नागरिकांनी चालक व वाहकाच्या निष्काळजीपणावर तीव्र नाराजी व्यक्त केली. घटनेची माहिती मिळताच नवापूर पोलिसांनी घटनास्थळी धाव घेत चालक आणि वाहकाला ताब्यात घेतले असून, पुढील तपास सुरू आहे.