संतोष जोशी

नांदेड: बिल्डर संजय बियाणी यांच्या हत्येनंतर पसरलेल्या दहशतीचा फायदा घेत एका खंडणीबहाद्दराने नांदेडच्या दोन बांधकाम व्यावसायिकांना एक कोटीची खंडणी मागितल्याने खळबळ उडाली आहे. पोलिसांनी तपास चक्रे फिरवून पत्राद्वारे एक कोटीची खंडणी मागणाऱ्या खंडणी बहाद्दराला अटक केलीय. पुरूषोत्तम मांगूळकर असं या खंडणीबहाद्दराचं नाव आहे.

दोन दिवसापूर्वी श्याम गुप्ता आणि कौस्तुभ फरांदे या बांधकाम व्यावसायिकाला एक कोटीची खंडणी मागत जिवे मारण्याची धमकी देणारे पत्र पाठवले होते. या बांधकाम व्यावसायिकांनी पोलिसांना या बाबत माहिती दिली. पोलिसांनी तपास करत खंडणीबहाद्दराचा छडा लावला. खंडणी बहाद्दर हा मुळचा हिमायतनगर येथील असून तो सध्या नांदेडमध्ये वास्तव्यास आहे ही बाब पुढे आली.

हे देखील पहा-

पुरुषोत्तम मांगूळकर यास पोलिसांनी अटक करुन त्याच्या विरोधात खंडणीचा गुन्हा दाखल केला. प्रसिद्ध बिल्डर संजय बियाणी यांच्या हत्येनंतर खंडणी बहाद्दर सक्रीय झालेत. काहीजण एकमेकांचे शत्रुत्व काढण्यासाठी निनावी पत्राचा प्रपंच करत आहेत. त्यातलाच हा प्रकार असल्याची माहिती नांदेड परिक्षेत्राचे विशेष पोलिस उप महानिरीक्षक निसार तांबोळी यांनी दिली.