संजय सूर्यवंशी

नांदेड : नांदेडच्या अर्धापूर तालुक्यातील लहान तांडा येथे आज सकाळच्या सुमारास दोन घराला आणि गोठ्याला आग लागल्याची घटना घडली आहे. या आगीच्या घटनेत आठ शेळ्यांचा होरपळून मृत्यू झाला आहे. तर अन्नधान्य आणि संसार उपयोगी साहित्य जळून खाक झाले आहे. 

नांदेडच्या (Nanded News) अर्धापूर तालुक्यातील लहान तांडा येथे आज सकाळी दोन घराला अचानक आग लागली. आगीने अचानक रौद्र रूप धारण करत जवळ असलेल्या गोठ्याला आग लागली होती. कैलास राठोड आणि ललिताबाई आडे असे या आगीत नुकसान ग्रस्त शेतकऱ्यांचे नाव आहे. घरांना अचानक आग लागल्याने गावात एकच धावपळ सुरु झाली. ग्रामस्थांनी आग विझविण्याचा प्रयत्न केला. मात्र आग नियंत्रणात आली नाही. यामुळे दोन्ही घरांसह गोठा पूर्णपणे जळून खाक झाला होता. 

लाखोंचे नुकसान 

आग आटोक्यात न आल्याने गोठ्यात बांधलेल्या आठ शेळ्यांचा आगीमुळे होरपळून मृत्यू झाला. तसेच घरात असलेले अन्नधान्य आणि संसार उपयोगी साहित्य जळून खाक झाले. तसेच शेतीतील अवजारे देखील जळून खाक झाल्याने यात दोन (farmer) शेतकऱ्यांचे लाखो रुपये नुकसान झाले आहे. सर्व संसारोपयोगी साहित्य जळून खाक झाल्याने दोन्ही शेतकऱ्यांचा संसार उघड्यावर आला आहे.