संजय सूर्यवंशी, नांदेड

नांदेडमध्ये ऑटो रिक्षाला भीषण अपघात झाल्याची घटना समोर आली आहे. ऑटो रिक्षा आणि वळूच्या धडकेमध्ये दोन जणांचा जागीच मृत्यू तर तिघे जण गंभीर जखमी झाले आहेत. नांदेडच्या माहूर तालुक्यातील नखेगाव परिसरात अपघाताची ही घटना घडली. जखमींना उपचारासाठी रुग्णालयामध्ये दाखल करण्यात आले आहे. या अपघाताचा तपास नांदेड पोलिसांकडून सुरू आहे.

मिळालेल्या माहितीनुसार, ऑटो आणि वळूच्या धडकेत दोन जण ठार तर तीन जखमी झालेत. नांदेडच्या माहूर - साखरणी महामार्गावरील नखेगाव परिसरात हा अपघात झाला. रात्री भरधाव असेलल्या प्रवाशी ऑटो समोर अचानकपणे वळू आला. त्यामुळे ऑटोने वळूला जोरदार धडक दिली. रिक्षा आणि वळूच्या धडकेमध्ये दोन प्रवाशांचा जागीच मृत्यू झाला.

या अपघातामध्ये तिघेजण जखमी झाले आहेत. अपघाताची माहिती मिळताच नांदेड पोलिसांनी घटनास्थळी धाव घेत तपास सुरू केला. पोलिसांनी जखमींना तात्काळ रुग्णालयात उपचारासाठी दाखल केले. जखमींवर शासकीय रुग्णालयात उपचार सुरू असून त्यांची प्रकृती स्थिर आहे. या अपघातात छत्रपती गवळी आणि रेखा जाधव या दोन जणांचा मृत्यू झाला. या अपघातामुळे खळबळ उडाली आहे.

गोंदियामध्ये देखील बैलामुळे अपघात झाला आहे. गोंदियात एसटीबस समोर बैल आल्याने चालकाचे बसवरील नियंत्रण सुटले. या बसने ४ वाहनाला धडक दिली. गोंदियाच्या आयटीआय समोरील रस्त्यावर हा अपघात झाला. या अपघातामध्ये दोन वाहनांचा चक्काचूर झाला. अपघातामध्ये बैलाचा जागीच मृत्यू झाला तर बस चालकासह प्रवासी किरकोळ जखमी झाले आहेत. बस चालकाला रस्त्यावर बसलेला बैल न दिसल्याने हा अपघात झाल्याचे सांगितले जात आहे. या अपघातामध्ये कोणतीही जीवितहानी झाली नाही.