संजय सूर्यवंशी
नांदेड : रस्त्याने जात असलेल्या बैलगाडीला ट्रकने जोरदार धडक दिली. या धडकेत शेतकरी आपल्या बैलगाडीसह पुलावरून थेट नदीत कोसळला. या अपघातात एक बैल जागीच ठार झाला; तर घटनेत शेतकरी थोडक्यात बचावला आहे. सदरचा अपघात नांदेडच्या किनवट तालुक्यातील आप्पारापेठ या ठिकाणी घडला आहे. 

नांदेडच्या किनवट तालुक्यातील आप्पारापेठ ते गोंडजेवली नाक्याकडे जाणाऱ्या रोडवरील श्रीधर रेड्डी यांच्या शेताजवळील अरुंद पुलावर ही घटना सकाळी नऊ वाजेच्या सुमारास घडली आहे. यावेळी किनवट तालुक्यातील आप्पारापेठ येथील नागन्ना कोतुलगाव (वय ४८) हा शेतकरी वैयक्तिक खाजगी कामासाठी बैलगाडीने छोटे गोटे शेताकडे नेण्यासाठी निघाले होते. याच दरम्यान भरधाव वेगाने येणाऱ्या ट्रकचा बैलगाडीला जोराचा धक्का लागला. 

धडकेत बैलगाडी पुलावरून कोसळली 

भरधाव वेगाने जाणाऱ्या ट्रकची धडक लागल्याने बैलगाडीसह शेतकरी नागन्ना पोतन्ना कोतुलगाव हे पुलावरून थेट खाली पाण्यात बैलगाडीसह कोसळले. या घटनेत एका बैलाचा जागीच मृत्यू झाला. तर शेतकऱ्याने आरडाओरड केल्याने आजूबाजूच्या परिसरातील नागरिक मदतीला धावून आले. त्यांनी दुसऱ्या बैलाचा दोर कापून बैलाला पाण्यातून बाहेर काढले. यामुळे एक बैल बचावला आहे.   

शेतकरी जखमी 

बैलगाडी पुलावरून खाली कोसळली. यात नदीत पाणी असल्याने शेतकरी पुलाच्या पाण्यातून कसा बसा बाहेर निघाला. तर नागन्ना कोतुळगाव हा अपंग शेतकरी या गंभीर घटनेतून बालबाल बचावला आहे. मात्र अपघातात एका बैलाचा मृत्यू झाल्याने शेतकऱ्याचे मोठे नुकसान झाले आहे.