संजय सूर्यवंशी
नांदेड : लग्न सोहळ्यासाठी जात असलेल्या वऱ्हाड्यांच्या गाडीला अपघात झाल्याची घटना नांदेड ते देगलूर महामार्गावर घडली. (Nanded) चालकाचे नियंत्रण सुटल्याने वऱ्हाड्यांनी भरलेला टेम्पो पलटी होऊन यात १५ वर्हाडी जखमी झाले आहेत. 

पुढील एक महिना लग्नाच्या तारखा नसल्याने आज शेवटची तारीख आहे. या मुहूर्तावर असलेल्या लग्न सोहळ्यासाठी जाणाऱ्या वऱ्हाडींच्या गाडीला अपघात झाला. नांदेड- देगलूर महामार्गावरील किन्हाळा गावाजवळ लग्नाला जाणाऱ्या टेम्पोचा अपघात (Accident) झाला. नांदेडच्या मुदखेड तालुक्यातील वैजापूर पारडी येथील वऱ्हाडी देगलूर तालुक्यातील शहापूर या गावी लग्नासाठी (Marriage) जात होते. बिलोली तालुक्यातील किन्हाळा या गावाजवळ या टेम्पोला अपघात झाला. टेम्पो चालकाचे नियंत्रण सुटल्याने टेम्पो रस्त्यालगत पलटी झाला. रस्त्यालगत असलेल्या एका खड्यात या टेम्पोत असलेले वऱ्हाडी जाऊन पडले. 

चौघांची प्रकृती चिंताजनक 

टेम्पो पलटी होऊन झालेल्या या अपघातात ४ जण अतिगंभीर तर ११ जण किरकोळ जखमी झाले आहेत. परिसरातील नागरिकांनी लागलीच मदतीसाठी धाव घेतली. यानंतर अपघातातील जखमींना स्थानिकांनी जवळच्या नायगाव येथील शासकीय रुग्णालयात उपचारासाठी दाखल करण्यात आले आहे. यातील ४ जणांची प्रकृती चिंताजनक असल्याची माहिती आहे.