पराग ढोबळे, साम टीव्ही

मध्य प्रदेशातील विद्यार्थिनीने नागपुरात आत्महत्या केल्याची खळबळजनक घटना घडली आहे. 'नीट'ची परीक्षा देण्याची हिंमत नाही, असं म्हणत विद्यार्थिनीने आयुष्य संपवलं. विद्यार्थिनीने आत्महत्या केल्याने नागपुरात खळबळ उडाली आहे.

मिळालेल्या माहितीनुसार, आकांक्षा चतुर्वेदी असे आत्महत्या केलेल्या व्यक्तीचे नाव आहे. तिने २० मे रोजी नागपुरात आत्महत्या केली. तिने आत्महत्या करण्याआधी लिहिलेली चिठ्ठी देखील समोर आली आहे. आकांक्षाने 'नीट'ची परीक्षा दिली होती. तिने पेपर चांगला गेल्याचे सांगितले होते. मात्र, पेपर फुटीमुळे संपूर्ण परीक्षा रद्द करण्यात आली.

आकांक्षा चतुर्वेदी ही विद्यार्थिनी मूळची मध्य प्रदेशातील मऊगंज जिल्ह्यातील मगनिया गावातील राहणारी होती. मुलीला शिकवण्यासाठी तिच्या वडिलांनी किसान क्रेडिट कार्ड वर 3 लाखांचे कर्ज घेतलं होतं. कुटुंब चालवण्यासाठी तिचे वडील नागपुरात काम करत होते. 20 मे रोजी नागपुरातील घरी कोणीही नसताना नैराश्यात गेलेल्या आकांक्षाने गळफास घेऊन आत्महत्या केली.

आकांक्षाचा मृतदेह घेऊन कुटुंबीय मुळगाव मगनिया येथे पोहचले. त्यानंतर तिच्या मृतदेहावर अंतिम संस्कार करण्यात आले. आकांक्षाने आत्महत्या करण्यापूर्वी लिहिलेली चिठ्ठी कुटुंबियांना मिळाली आहे. त्यात नीट परीक्षेमुळे आत्महत्या करत असल्याचे नमूद केले आहे.

"मम्मी-पप्पा तुम्हाला विश्वास होता की तुमची मुलगी डॉक्टर बनणार आहे. मात्र आता पुन्हा नीट परीक्षा देण्याची हिंमत नाही, असं आकांक्षाने आत्महत्या करण्याआधी इंग्रजीत लिहिलेल्या चिठ्ठीमध्ये उल्लेख आहे. नागपूरच्या अंबाझरी पोलीस स्टेशन येथे आकस्मिक मृत्यूची नोंद केली आहे. पोलिसांकडून पुढील तपास सुरू आहे. आकांक्षाच्या आत्महत्येने तिच्या कुटुंबावर दु:खाचा डोंगर कोसळला आहे.