पराग ढोबळे, नागपूर

नागपूरमध्ये धर्माच्या नावाने शाळेत प्रवेश नाकारल्याचा धक्कादायक प्रकार समोर आला आहे. या प्रकरणी शाळा संस्था सचिवाविरोधात जरीपटका पोलिस ठाण्यात गुन्हा दाखल करण्यात आला आहे. महाराष्ट्र राज्य अल्पसंख्याक आयोगाचे अध्यक्ष प्यारे जिया खान यांच्याकडे तक्रार प्राप्त झाल्यानंतर चौकशीचे आदेश देण्यात आले आहेत. त्यानंतर प्राथमिक चौकशीअंती गुन्हा दाखल करण्यात आला आहे.

दयानंद आर्य कन्या विद्यालय जरीपटका नागपूर येथील शाळेच्या सचिवावावर धर्माच्या नावाने शाळेत प्रवेश नाकारल्याचा आरोप करण्यात आला आहे. दयानंद आर्य कन्या विद्यालय जरीपटका, नागपूर या शाळेचे संस्था सचिव राजेश लालवाणी यांच्या दबावात येऊन मुस्लिम मुलींचे प्रवेश अर्ज घेऊन प्रवेश प्रलंबित ठेवले. काही मुलींच्या पालकांना प्रवेश पूर्ण झाले असून जागा नसल्याचे तोंडी कळवून प्रवेश नाकारण्यात आला.

मुलीला प्रवेश नाकारलेल्या पालकांनी अल्पसंख्यांक आयोगाकडे धाव घेतली. अल्प्ससंख्यक आयोगाकडून महिला व बाल विकास विभाग तसेच शिक्षण विभाग यांना चौकशीचे आदेश दिले. यात अधिकाऱ्यांनी चौकशी करून प्रकरणाची सत्यासत्यता लक्षात आल्यानंतर जरीपटका पोलिसात राजेश लालवानी आणि शिक्षिका अनिता आर्य यांच्याविरुद्ध विविध कलमांतर्गत गुन्हा नोंदविण्यात आला आहे. या धक्कादायक प्रकाराची सध्या नागपूरमध्ये चर्चा होत आहे.