पराग ढोबळे, नागपूर

Nagpur RDX plant explosion news : उपराजधानीमध्ये नागपूरमध्ये RDX बनवणाऱ्या प्लांटमध्ये मोठी दुर्घटना घडली. बाजारगव येथील सोलार एक्सप्लोसिव्हमध्ये मध्यरात्री 12.30 वाजता PP 15 मधील CB 1 प्लॅन्टमध्ये स्फोट झाला. यामध्ये एकाचा जागीच मृत्यू झाला, तर १७ जण जखमी झाले आहेत. यापैकी सहा जणांची प्रकृती अतिशय गंभीर असून त्यांच्यावर आयसीयूमध्ये उपचार सुरू आहेत. स्फोट झालेल्या या प्लॅन्ट मध्ये hmx TNT आणि RDX ची निर्मिती होते. काही जखमींच्या हाताला, काहींच्या पायाला तर दगड उडल्यामुळे डोक्याला दुखापत झाली आहे.

मध्यरात्री काम सुरू असताना प्लॅन्टमध्ये धूर निघत असल्याचं लक्षात आल्यानंतर कामगारांना तात्काळ बाहेर काढण्यात आले होते. त्यामुळे मोठी दुर्घटना टळली. तेच स्फोट झालेल्या काही अंतरावरून RND लॅबमध्ये असणारा मयूर नामक व्यक्तीचा मृत्यू झाला. हा स्फोट इतका मोठा होता की, त्यानंतर मलबा आणि इमारत सहित्याचे तुकडे हे दूरवर फेकले गेले. यातील एक मोठा दगड त्या व्यक्तीला लागल्यानं मृत्यू झाल्याची माहिती मिळाली.

सोलार एक्सप्लोसिव्ह ही दारुगोळा बनवणारी मोठी नामांकित कंपनी आहे. 17 डिसेंबर 2023 मध्ये सुद्धा अशाच पद्धतीने स्फोट झाला होता. त्यामध्ये नऊ लोकांचा मृत्यू झाल्याची नोंद आहे. दोन वर्षांमध्ये पुन्हा एकदा भयंकर स्फोट झाला. हा स्फोट इतका भयंकर होता की, प्लांटपासून पाचशे मीटर अंतरावर काम करत असलेल्या दुसऱ्या प्लांटमधील कर्मचारी या स्फोटातून उडालेल्या मलब्यामुळे जखमी झाले. या ब्लास्टची भीषणता इतकी मोठी होती की जवळपास 700 ते 800 मीटर पर्यंत इमारतीचे सिमेंटचे तुकडे सळाखा या दूरवर फेकल्या गेल्या.