पराग ढोबळे 

नागपूर : नववर्षाच्या स्वागतासाठी सर्जन सज्ज झाले असताना या दरम्यान काही अनुचित प्रकार घडू नये यासाठी पोलिसांची ठिकठिकाणी नाकाबंदी करण्यात आली होती. नागपूर जिल्ह्यात देखील पोलिसांकडून नाकाबंदी करण्यात आली असताना  कोतवाली पोलीस ठाण्यांतर्गत थर्टी फार्स्टच्या रात्री नाकाबंदी दरम्यान ४१ लाखांची अवैध रोकड जप्त करण्यात आली आहे. 

नववर्षा उत्सवादरम्यान मद्य प्राशन करून धिंगाणा घालणाऱ्यांना रोखण्यासाठी पोलिसांचा ठिकठिकाणी बंदोबस्त लावण्यात आला होता. नागपूर शहरात नववर्षाच्या सेलिब्रेशनमुळे पोलिसांनी शहरात कडक बंदोबस्त लावला होता. त्यामुळे रस्त्यावरून येणाऱ्या-जाणाऱ्या प्रत्येक वाहनाची पोलिसांकडून बारकाईने तपासणी करण्यात येत होती. या दरम्यान नागपूरच्या कोतवाली पोलिसांकडून मध्यरात्री शिवाजी पुतळा परिसरात स्कूटरवरून रोकड घेऊन जाणाऱ्या दोघांना पकडले.

रकमेबाबत कोणतेही कागदपत्र नाही 

प्राथमिक तपासात ही रक्कम हवालाद्वारे आणण्यात आले असल्याचा संशय व्यक्त केला जात आहे. दरम्यान, शिवाजी पुतळ्याजवळ दोन तरुण मोपेडवरून संशयास्पदरीत्या जात असल्याचे दिसून आले. त्यांच्या वाहनाची तपासणी केली असता त्यात सुमारे ४१ लाख ६७ हजार ३०० रुपयांची रोकड आढळून आली. या रोख रकमे संदर्भात कोणतेही ठोस कागदपत्र सादर करता न आल्याने पोलिसांनी या दोन तरुणांना ताब्यात घेऊन रोख रक्कम जप्त केली.  

दोघे पोलिसांच्या ताब्यात 

प्राथमिक तपासात ही रोकड हवालाशी संबंधित असल्याचा संशय व्यक्त केला जात आहे. रोहित गुलाबचंद कोरी आणि संगम रघुवर प्रसाद कोरी नावाचे तरुण हे दोघेही मध्य प्रदेशातील जबलपूर येथील रहिवासी असून त्यांच्याकडे ही रोकड सापडली आहे. दोघांना ताब्यात घेत या प्रकरणात आता कोतवाली पोलीस अधिक तपास करत आहेत.