पराग ढोबळे, साम टीव्ही

नागपूर : नागपुरातील इंजिनीअरिंगला असलेल्या विद्यार्थ्याने जन्मदात्या आई-वडिलांची हत्या केल्याची घटना घडली आहे. नागपूरमधील इंजिनीअरिंगला असलेल्या विद्यार्थ्याने केलेल्या कृत्याने संपूर्ण परिसरात खळबळ उडाली आहे. नागपूरच्या कपिलनगर पोलीस स्टेशन हद्दीत ही घटना घडली आहे. पोलिसांनी या प्रकरणी गुन्हा नोंदवून कारवाई करण्यास सुरुवात केली आहे.

मिळालेल्या माहितीनुसार, नागपुरातील कपिल नगर पोलीस स्टेशनच्या हद्दीतील खसारा परिसरामध्ये मुलानेच जन्मदात्या आई-वडिलांची हत्या केल्याची धक्कादायक घटना उघडकीस आली आहे. मागील महिन्यातील 26 डिसेंबरची ही घटना आहे. घरात दुर्गंधी पसरल्याने घटना उघडकीस आली आहे. लीलाधर डाखोळे आणि अरुणा डाखोळे असे मृत आई-वडिलांचे नाव आहे. उत्कर्ष डाखोळे असे हत्या करणाऱ्या आरोपी मुलाचे नाव आहे.

लीलाधर डाखोळे कोराडी थर्मल प्लांटमध्ये टेक्नीशियन होते. तर आई अरुणा डाखोळे प्राथमिक शाळेत शिक्षिका होत्या. आरोपी उत्कर्ष 6 वर्षापासून इंजीनिअरिंग शिकत होता. मात्र त्याचे काही पेपर बॅक राहिले होते. वारंवार नापास होत असल्याने आई-वडीलांनी त्याला दुसरे शिक्षण घेण्याकरिता सांगितले. तसेच इतर काही करण्याकरता आग्रह करत होते.

मात्र त्यामुळे त्याची नाराजी होती. आई-बाबांसोबत त्याचे खटके उडत होते. याच रागातून 26 डिसेंबरला दुपारी एक वाजता आईची हत्या केली. संध्याकाळी पाचनंतर वडील घरी आल्यावर चाकूने वार करत वडिलांची हत्या केली. दरम्यान उत्कर्ष कोणती नशा करत होता का, याचाही तपास पोलीस करत आहे.

वडिलांची हत्या केल्यानंतर त्यानं बहिणीला आई-वडील मेडिटेशन करिता बेंगळूरूला गेल्याचं सांगितले. बुधवारी त्यांच्या घरातून दुर्गंधी आल्यानंतर शेजाऱ्यांनी पोलिसांना कळवल्यावर ही घटना उघडकीस आली. मुलाने जन्मदात्या आई-वडिलांची हत्या केल्याने परिसरात एकच भीती पसरली आहे. दोघांच्या मृत्यने ते राहत असलेल्या परिसरात शोककळा पसरली आहे.