नागपूर : वाहन पार्किंगच्या वादातून नागपूरच्या विनोबा भावे नगरात एका तरुणाची हत्या करण्यात आली. तर दोन जण जखमी झाले आहेत. या महिन्यातील ही आठवी हत्या (Crime News) ठरली. यशोधरानगर पोलिसांनी (Police) या प्रकरणी गुन्हे दाखल करत तपास सुरू केला. (Breaking Marathi News)

नागपूरच्या यशोधरानगर पोलीस स्टेशन हद्दीत बॅटरीवर चालणारी ऑटो रिक्षा पार्क करण्याच्या वादातून हाणामारी झाली. त्यात एकाच मृत्यू झाला. योगेश धामने असे मृत युवकाचे नाव असून तो पेंटिंगचे काम करत होता. मोनू बन्सीलाल रायतदार, सुदामा बन्सीलाल रायतदार आणि नंदलाल रायतदार अशी आरोपींची नावे आहेत. रामभाऊ शाह व योगेश यांचा आरोपींशी घरासमोर वाहन ठेवण्यावरून वाद झाला होता.

रात्री पुन्‍हा वाद उद्‌भवला

रात्री जेवण झाल्यावर योगेश व रामभाऊ घराबाहेर गप्पा मारत होते. यावेळी योगेश व मोनूमध्ये परत वाद झाला. त्यातून रामभाऊने मोनूला मारहाण करण्यास सुरुवात केली. हे पाहून सुदामा व नंदलाल हे घराबाहेर आले. त्यांनी योगेशला मारहाण करण्यास सुरुवात केली. त्यांनी चाकू व रॉडने योगेशवर वार केले. यात योगेश रक्तबंबाळ झाला व निपचित पडला. मारहाणीत रामभाऊ शाहू व मोनू हे देखील जखमी झाले. पोलिसांनी आरोपींविरोधात गुन्हा दाखल केला आहे.