पराग ढोबळे, साम टीव्ही, प्रतिनिधी

Nagpur : नागपूरमधून एक धक्कादायक घटना उघडकीस आली आहे. नागपूरच्या मध्यवर्ती कारागृहात एका कैद्याने आत्महत्या केली आहे. अंतर्वस्त्राच्या इलॅस्टिकने गळफास लावून या कैद्याने स्वत:चे आयुष्य संपवल्याची माहिती समोर आली आहे. या घटनेची माहिती समोर आल्यानंतर परिसरात एकच खळबळ उडाली.

मिळालेल्या माहितीनुसार, तुळशीराम शेंडे असे मृतक कैद्याचे नाव आहे. हा कैदी पत्नीच्या हत्येप्रकरणी आजन्म कारावासाची शिक्षा भोगत होता. मंगळवारी (१५ जुलै रोजी) तुळशीराम शेंडे याने नागपूर मध्यवर्ती कारागृहाच्या मागच्या बाजूला गळफास घेत आत्महत्या केली होती. नैराश्यातून त्याने आत्महत्या केल्याचा अंदाज वर्तवला जात आहे.

तुळशीराम शेंडे याने त्याच्या पत्नीची हत्या केली. या हत्या प्रकरणामध्ये भंडारा न्यायालयाने तुळशीरामला जन्मठेपेची शिक्षा सुनावली होती. सुरुवातीला नातेवाईक तुळशीरामला भेटायला यायचे. पण मागील दोन ते तीन वर्षात कोणी त्याला भेटायला गेले नाही. यामुळे नैराश्यातून तुळशीरामने स्वत:चे आयुष्य संपवल्याचा प्राथमिक अंदाज आहे.

नागपूर मध्यवर्ती कारागृहात असलेल्या कारखान्याच्या मागच्या बाजूला अंतवस्त्राच्या इलॅस्टिकने तुळशीरामने गळफास लावून घेत आत्महत्या केली. या प्रकरणी धंतोली पोलिसांनी आकस्मिक मृत्यूची नोंद करण्यात आली आहे. मध्यवर्ती कारागृहामध्ये कैद्याच्या आत्महत्येची बातमीमुळे परिसरात एकच खळबळ उडाली आहे.