लातूर : लातूर शहरातील सदगुरूनगरमधील राधाकृष्ण मंदिराच्या पाठीमागील वस्तीत रस्त्यावर एक ३५ वर्षीय तरूणाचा दोन अज्ञात मारेकर्‍यांनी दिवसाढवळ्या कत्ती आणि चाकूचे सपासप वार करून निर्घून खून केल्याची खळबळजनक घटना आज दुपारी सव्वा तीनच्या दरम्यान घडली आहे. या घटनेमुळे शहरात दहशतीचे वातावरण निर्माण झाले आहे.

हे देखील पहा -

गोकूळ मंत्री असे या खून झालेल्या युवकाचे नाव असल्याचे सांगण्यात येत आहे. या खूनाच्या घटनेने संपूर्ण लातूर शहर हादरले आहे. या प्रकरणी शिवाजीनगर पोलिसांनी पंचनामा करून गुन्हा नोंद करण्याची प्रक्रिया सुरु केली आहे. आज दुपारी ३.१५ वाजण्याच्या सुमारास दादोजी कोंडदेवनगरात राहणारा गोकूळ मंत्री नामक ३५ वर्षीय इसम आपल्या एमएच २४ बीए ४३३९ या स्पेलंडर दुचाकीवरून घराबाहेर पडला होता. त्यासोबत दोन वीस-बावीस वर्षीय दोन तरूण त्याच्या दुचाकीवर बसून जात होते.

त्याच तरूणांनी सदगुरू नगरात आल्यानंतर राधाकृष्ण मंदिराच्या मागील वस्तीतील रस्त्यावर गोकूळ मंत्री याच्या शरीरावर, डोक्यात, पाठीत चाकू व कत्तीने सपासप वार करून निर्घृणपणे खून केला आणि मारेकर्‍यांनी तेथून पळ काढला. अशी चर्चा सद्गुरु नगरात जमलेले प्रत्यक्षदर्शी दबक्या आवाजात सांगत होते. या घटनेची माहिती मिळताच शिवाजीनगर पोलिस ठाण्याचे पोलिस निरीक्षक सुनिलकुमार पुजारी हे पोलिस ताफ्यासह घटनास्थळी हजर होऊन पंचनामा केला असून मयताचे प्रेत शवविच्छेदनासाठी शासकीय रुग्णालयात पाठवून देण्यात आले आहे. या प्रकरणी शिवाजीनगर पोलिस ठाण्यात गुन्हा नोंद करण्याची प्रक्रिया सुुरु आहे.

Edited By : Krushnarav Sathe