संजय गडदे, साम टीव्ही

मुंबईत मतदार याद्यांमधील गोंधळाचा मुद्दा पुन्हा एकदा उफाळून आला आहे. चारकोप नंतर आता वर्सोवा विधानसभा मतदारसंघातही मतदार याद्यांमध्ये मोठा घोळ झाल्याचा आरोप महाराष्ट्र नवनिर्माण सेनेनं केला आहे.

मनसेचे वर्सोवा विभागाध्यक्ष संदेश देसाई यांनी या संदर्भात गंभीर आरोप करत म्हटलं आहे की, मतदार याद्यांमधील विसंगती पाहता निवडणूक आयोगाकडून तात्काळ कारवाई होणे गरजेचे आहे. मनसैनिकांनी केलेल्या अभ्यासात यादी क्रमांक 268 मध्ये एका घराच्या पत्त्यावर हिंदू, मुस्लिम आणि इतर धर्मीय मतदारांची नावे नोंदवण्यात आल्याचं समोर आलं आहे.

याचबरोबर साडेतीनशेहून अधिक मतदारांच्या पत्त्यांचा ठिकाणाच नाही, अशी धक्कादायक बाबही मनसेकडून उघड करण्यात आली आहे. विशेष म्हणजे, महाराष्ट्रातील मतदार याद्यांमध्ये नावे मराठी भाषेत असणे अपेक्षित असताना काही नावे बंगाली भाषेत आढळली आहेत. या सर्व गोंधळाबाबत मनसेनं राज्य निवडणूक आयोगाकडे तक्रार नोंदवली असून, याद्या तात्काळ दुरुस्त न झाल्यास मोठ्या आंदोलनाचा इशारा देण्यात आला आहे.

मनसेने यापूर्वीही मुंबईतील विविध मतदारसंघांमध्ये मतदार याद्यांतील चुका उघड करत प्रशासनाचे लक्ष वेधले होते. आता वर्सोव्यातील या नव्या प्रकरणामुळे निवडणूक आयोगाच्या कार्यपद्धतीवर पुन्हा एकदा प्रश्नचिन्ह निर्माण झालं आहे.

लोकसभेचे विरोधी पक्षनेते राहुल गांधी हे देखील सातत्याने अनेक पुरावे सादर करत निवडणूक यादीतील घोळ दाखवत निवडणूक आयोगावर गंभीर आरोप करत आहे. काही दिवसांपूर्वी विरोधी पक्षासह इतर घटक पक्षांनी मुंबईमध्ये सत्याचा मोर्चा काढत राज ठाकरे यांनी आयोगावर तोफ डागली होती. अशातच आता पुन्हा एकदा मुंबईसारख्या ठिकाणी मतदारयद्यांमध्ये गोंधळ निर्माण झाल्याने मनसेने आक्रमक पवित्रा घेतला आहे.