बीड येथे मल्टीस्टेट बँकेचे ठेवीदार आक्रमक होत रस्त्यावर उतरलेत. मल्टीस्टेट बँकांमध्ये अडकलेले पैसे ठेवीदारांना तात्काळ परत केले जावे या मागणीसाठी बीड शहरातील छत्रपती शिवाजी महाराज चौकात सचिन उबाळे यांच्या माध्यमातून मागील पाच दिवसांपासून उपोषण सुरू आहे. आज सर्व ठेवीदार एकत्र जमत धुळे सोलापूर राष्ट्रीय महामार्गावर उतरत रास्ता रोको केला आहे.

बीड जिल्ह्यातील ज्ञानराधा मल्टीस्टेट, साईराम मल्टीस्टेट, राजस्थानी मल्टीस्टेट, जिजाऊ मल्टीस्टेट, लक्ष्मी माता अर्बन आणि मराठवाडा अर्बन या बँकेत हजारो ठेवीदारांनी आपल्या ठेवी रोख स्वरूपात ठेवल्या होत्या. परंतु गेल्या सहा महिन्यांपासून या सर्व मल्टीस्टेट बँकांना कुलूप लागले आहे.

त्यामुळे कोट्यावधी रुपयांच्या ठेवी यात अडकून पडल्यात. याच ठेवी ठेवीदारांना मिळाव्या यासाठी पाठपुरावा केला जातोय. परंतु अद्याप ठेवीदारांना त्यांचे पैसे मिळाले नाहीत. अशातच आपल्या ठेवी मिळाव्यात यासाठी छत्रपती शिवाजी महाराज चौकात एकत्र जमत राष्ट्रीय महामार्ग अडवण्यात आला. यावेळी जोरदार घोषणाबाजी करून ठेवीदारांनी आपल्या मागण्यांकडे लक्ष वेधले आहे.

Edited By : Siddharth Latkar