मालवण : सिंधुदुर्गच्या मालवणमधील रोजकोट किल्ल्यावरील छत्रपती शिवरायांचा पुतळा कोसळल्यानंतर राज्यातील राजकीय वातावरण तापलं आहे. आज बुधवारी या घटनास्थळाची पाहणीसाठी आमदार आदित्य ठाकरे आणि खासदार नारायण राणे एकाचवेळी आले होते. यावेळी दोन्ही नेत्यांच्या कार्यकर्त्यांनी जोरदार घोषणाबाजी केल्यानंतर हाणामारी देखील झाली. यावेळी दोन्ही नेत्यांच्या महिला कार्यकर्त्यांही एकमेकांना भिडल्या. या राड्यानंतर परिसरात एकच खळबळ उडाली आहे. कार्यकर्त्यांची हाणामारी रोखण्यासाठी पोलिसांना मध्यस्थी करावी लागली. या किल्ल्यावरील संपूर्ण राड्यावर भाजप नेते, खासदार नारायण राणे यांनी संतप्त प्रतिक्रिया दिली आहे.

मालवणमध्ये ठाकरे आणि राणे यांच्या कार्यकर्त्यांमध्ये हाणामारीची घटना घडल्यानंतर राजकीय वर्तुळात खळबळ उडाली आहे. दोन्ही नेत्यांच्या कार्यकर्त्यांमध्ये राडा झाल्यानंतर महाविकास आघाडीच्या नेत्यांनी टीका केली आहे. तर आता याच घटनेवर खासदार नारायण राणे यांनी देखील आक्रमक प्रतिक्रिया दिली आहे.

खासदार नारायण राणे म्हणाले, ' निवडणुका समोर असल्याने विरोधक त्याचे भांडवल करत आहेत. छत्रपती शिवरायांचा पुतळा कोसळणे हे निमित्त करून तिन्ही विरोधी गट एकत्र येऊन टीका करत आहेत. मालवण येथील लोक येथे पुतळ्यासमोर नतमस्तक झाली आहेत. मात्र आज जे आले आहेत. त्यातील एकही या राजकोट ठिकाणी येऊन नतमस्तक झाले नव्हते. आरोपापलीकडे यांचं सामाजिक कार्य नाही'.

'आम्हाला शिवद्रोही बोलतात. उद्धव ठाकरेंकडून काय अपेक्षा? हिंदूत्व आणि छत्रपती शिवराय यांच्या नावाचा वापर करून उदरनिर्वाहाचे साधन उद्धव ठाकरे यांनी केले. आज आमच्याकडून काहीही झालं नाही. मी काही चिरीमिरी करत नाही. नाही तर एकही घरी परत गेला नसता, अशी आक्रमक प्रतिक्रिया नारायण राणे यांनी दिली आहे.