मनसेनंतर आता भाजप मशीदीवरील अवैध भोंगे उतरवण्यासाठी मैदानात उतरलंय. मशीदीवरील अवैध भोंग्यांवर कारवाईची मागणी जोर धरतेय. त्यामुळे अवैध भोंग्यांचा मुद्दा पुन्हा एकदा ऐरणीवर आलाय. तर भाजपच्या किरीट सोमय्यांनी मुंबईत 1600 मशीदीवरील भोंगे अवैध असल्याचं सांगत ते उतरवणार असल्याचा इशारा दिलाय. त्यामुळे अस्वस्थ मुस्लीम नेत्यांनी अजित पवारांकडे तक्रार केलीय.

तर मुस्लीम नेत्यांच्या तक्रारीनंतर अजित पवारांनी अनधिकृत भोंग्यासंदर्भात बैठक बोलावली. एवढंच नाही तर अजित पवारांनी थेट किरीट सोमय्यांना तंबी दिल्याची चर्चा आहे.अजित पवारांनी नेमकं काय म्हटलंय? पाहूयात.

अजित पवारांची सोमय्यांना तंबी

नियमांची पायमल्ली करणाऱ्यांवर कारवाई करण्याचे पोलीस आयुक्तांना आदेश

सोमय्यांच्या दबावात येऊन पोलिसांनी कारवाई करु नये

सोमय्यांनी कुठल्याही मशिदीत जाऊ नये, पोलिसांत जावं

मात्र न्यायालयाच्या निर्णयानुसार सोमय्या भूमिका घेत असल्याने मंत्री आशिष शेलारांनी सोमय्यांची पाठराखण केलीय. त्यामुळे भोंग्याच्या मुद्द्यावरुन महायुतीत राजकारण तापलंय. लोकसभा निवडणुकीपूर्वी मनसेने भोंग्याचा मुद्दा तापवला होता.. तर कोर्टाच्या निर्णयानंतर अनधिकृत भोंगे हटवण्यात आले.

मात्र आता मुंबई महापालिका निवडणुकीच्या तोंडावर महायुतीतील पक्षच भोंग्याच्या मुद्द्यावर आमने-सामने आलेत.. त्यामुळे पोलीस अजित पवारांचे निर्देश पाळणार की भाजपच्या नेत्यांच्या दबावात कारवाई सुरुच ठेवणार? असा सवाल विचारला जातोय.