बीड : बीड (Beed) जिल्ह्यात अतिवृष्टीने हाहा:कार केल्याने, जिल्ह्यातील शेतकरी हतबल झाला आहे. याच हतबल झालेल्या शेतकऱ्यांना पिकांसह जमिनीचे पंचनामे करण्यासाठी पैशाची मागणी केली जात असल्याचा धक्कादायक आरोप, बीडच्या वडवणी तालुक्यातील शेतकऱ्यांनी केला आहे. बीड जिल्ह्यामध्ये अतिवृष्टीने शेतकऱ्याचं (farmers) प्रचंड नुकसान झालं आहे. तर, वाहून गेलेल्या पिकासह, शेतीचे पंचनामे करायचे सोडून पंचनामे करण्यासाठी विमा कंपन्या एजंटमार्फत हेक्टरी 2 हजार रुपये मागत असल्याचा धक्कादायक प्रकार साम टिव्हीने समोर आणला आहे.

हे देखील पहा :

अगोदरच अतिवृष्टीने (Heavy rain) उध्वस्त झालेला शेतकऱ्याला लुटणारे विमा कंपन्यांचे (Insurance Companies) अधिकारी आणि कृषी विभागाचे अधिकारी कोण? असा सवाल उपस्थित झाला आहे. बीड जिल्ह्यात अतिवृष्टीचा सर्वात जास्त फटका वडवणी तालुक्यातील 42 गावांना बसलेला आहे. या गावात मोठ्या प्रमाणात शेतजमीन, विहिरी, रस्ते आणि पूल वाहून गेलेले आहेत. यातच खरीपातील सोयाबीन, ऊस, कापूस, मूग, उडीद या पिकांचे देखील प्रचंड नुकसान झाले आहे.

आपत्ती मधून शेतकऱ्यांना दिलासा मिळावा म्हणून पंतप्रधान पिक विमा योजना राबवली जाते. यात शेतकरी प्रीमियम देखील भरतात मात्र पंचनामा करतेवेळी विमा कंपनी आणि कृषी विभागाकडून शेतकऱ्यांना हेक्‍टरी 2 हजार रुपये मागितले जात असल्याचा धक्कादायक प्रकार उघडकीस आला आहे. वडवणी तालुक्यातील कोठारबन, चिखल बीड, यासह पिंपळटक्का या गावातील शेतकऱ्यांना, विमा कंपनीचे कृषी विभागाने नेमलेले एजंट, दोन हजार रुपये मागत असल्याचे शेतकरी सांगत आहेत.

Edited By : Krushnarav Sathe