Sangli News : राष्ट्रवादी काँग्रेसचे पदाधिकारी आणि बाबा ग्रुपचा अध्यक्ष नालसाब मुल्ला यांच्या खून प्रकरणातील १३ संशयितांना महाराष्ट्र संघटित गुन्हेगारी नियंत्रण अधिनियम अर्थात मोक्काअंतर्गत कारवाईला मंजुरी देण्यात आली आहे. कोल्हापूर परिक्षेत्राचे विशेष पोलिस महानिरीक्षक सुनील फुलारी यांनी याबाबतचे आदेश दिले आहेत. (Maharashtra News)

पाेलिसांनी दिलेल्या माहितीनूसार मोक्काअंतर्गत कारवाई झालेल्यांमध्ये टोळी प्रमुख स्वप्नील संतोष मलमे (वय २०, रा. खरशिंग, ता. कवठेमहांकाळ), सनी सुनील कुरणे (२३, जयसिंगपूर, जि. कोल्हापूर), विशाल सुरेश कोळपे (२०, लिंबेवाडी, रांजणी, ता. कवठेमहांकाळ), सचिन विजय डोंगरे (गुलाब कॉलनी, सांगली), प्रशांत ऊर्फ बबलू संभाजी चव्हाण (२३), रोहित अंकुश मंडले (२२, दोघेही खरशिंग) यांचा समावेश आहे.

याबराेबरच ऋतिक बुद्ध माने (२२, कोकळे, ता. कवठेमहांकाळ), विक्रम तमान्ना घागरे (२२, रा. ढालगाव, ता. कवठेमहांकाळ), प्रवीण अशोक बाबर (रा. आलेगाव, ता. सांगोला), अक्षय बाळासाहेब शेंडगे (रा. कलानगर, सांगली),अवधूत सुनील पानबुडे (रा. नळभाग,सांगली), रोहित बाबासाहेब धेंडे आणि अल्पक राजकुमार कांबळे (दोघेही रा. एरंडोली, ता. मिरज) यांचा देखील समावेश आहे.

यातील धेंडे आणि कांबळे हे दोघे अद्यापही पसार आहेत. १७ जून रोजी गोळ्या झाडून आणि धारदार शस्त्राने वार करून नालसाब मुल्ला याचा खून करण्यात आला होता अशी माहिती पाेलिसांनी दिली.

Edited By : Siddharth Latkar