सांगली : दराेड्याच्या तयारीत असलेल्या पाच युवकांना (youth) मिरजच्या (miraj) महात्मा गांधी चौकी पोलिसांनी अटक (arrest) केली आहे. ही कारवाई मध्यरात्री करण्यात आली आहे. मिरज पाेलीसांना (miraj police) मिळालेल्या माहितीनंतर त्यांनी संबंधित ठिकाणी छापा टाकून ही कारवाई केली आहे. (sangli latest marathi news)

याबाबतची अधिक माहिती अशी : मध्यरात्रीच्या सुमारास दोन मोटारसायकलवरून आलेले पाच तरुण हे रेल्वे पोलीस लाईन जवळ दुकानांच्या आडोश्याला बसले होते. त्यांच्याकडे कटावणी, स्क्रू ड्राईव्हर पक्कड, मिरची पूड असे साहित्य असल्याची गोपनीय माहिती मिरजेच्या महात्मा गांधी चौकी पोलिसांना मिळाली होती.

त्यानंतर पोलीसांचे एक पथक घटनास्थळी गेले. तेथे त्यांनी कानाेसा घेत छापा टाकला. या छाप्यात पाच जणांना ताब्यात घेतले. त्यांच्याकडे कसून चाैकशी करण्यात आली. त्यानंतर त्यांच्याकडील कटावणी, स्क्रू ड्राईव्हर, पक्कड तसेच मिरची पूड आणि दोन मोटरसायकल असे साहित्य पोलिसांनी जप्त केले.

या प्रकरणी पाेलीसांनी श्रीशैल राजमाने ,अनिस अल्ताफ सौदागर ,हनिफ रजाक शेख, रियाज बडेसाहेब शेख व एक अल्पवयीन मुलास अटक केली. अधिक चौकशी केली असता यातील श्रीशैल राजमाने हा रेकॉर्ड वरील गुन्हेगार आहे. त्याला सांगली आणि कोल्हापूर या दोन जिल्ह्यातून एक वर्षासाठी हद्दपार करण्यात आले आहे.

त्याने संबंधित आदेशाचा भंग केल्याने त्यावर आणखी एक गुन्हा दाखल केला जाणार आहे. दरम्यान पाच युवकांना अटक केल्याने मोठा अनर्थ टळला आहे. ही कारवाई सहाय्यक पोलीस निरीक्षक रविराज फडणीस यांच्या मार्गदर्शनाखाली उपनिरीक्षक कुमार पाटील, सुभाष पाटील, उदय कुलकर्णी, चंद्रकांत गायकवाड, विनायक झांबरे, अमोल आवळे यांनी केली.

Edited By : Siddharth Latkar