सुशांत सावंत

Shambhuraj Desai News : हिवाळी अधिवेशनात सत्ताधारी आणि विरोधकांमध्ये गायरान जमीन घोटाळ्यावरून आरोपांच्या फैरी झडत आहे. हिवाळी अधिवेशनात विरोधकांडून मुख्यमंत्री एकनाथ शिंदे, अब्दुल सत्तार, संजय राठोडनंतर आता ठाकरेंच्या निशाण्यावर शंभूराज देसाई आहेत. ठाकरे गटाकडून विधानभवनाच्या पायरीवर मंत्री उदय सामंत, मंत्री अब्दुल सत्तार, मंत्री संजय राठोड आणि मंत्री शंभूराज देसाई यांच्या विरोधात घोषणाबाजी सुरू केली आहे. याचदरम्यान घोटाळ्याच्या आरोपानंतर मंत्री शंभूराज देसाई यांनी स्पष्टीकरण दिलं आहे. (Latest Marathi News)

मंत्री शंभूराज देसाई (Shambhuraj Desai) आरोपावर स्पष्टीकरण देताना म्हणाले, 'आज मी सकाळपासून मी विधानसभा आणि परिषदेत व्यग्र होतो. अनिल परब यांनी माझ्यावर काही आरोप केले आहेत. मी कामकाजात व्यस्त होतो म्हणून बोलू शकलो नाही. नावली तालुका महाबळेश्वर येथे माझी शेतजमीन आहे'.

'२००३ साली मी शेतजमीन खरेदी केले आहे. जमीन आणि जमिनीत असणारे घर यासोबत मी खरेदी केली आहे. अनिल परब यांनी केलेला आरोप खोटा आहे, असे स्पष्टीकरण शंभूराज देसाई यांनी दिलं आहे.(Nagpur News)

'शेतजमीन आणि घरासह असा उल्लेख मी माझ्या निवडणुकीच्या अर्जात भरला आहे. बेछूट आरोप अनिल परब करत आहेत. मी मंत्री म्हणून आज जाहीरपणे सांगतो, मी चौकशीला सामोरे जाण्याची तयारी आहे. पण मला अनिल परब यांना एवढंच सांगायचं आहे की, मी रीतसर जमीन खरेदी केली आहे', असेही शंभूराज देसाई म्हणाले.

तर यावेळी शंभुराज देसाई यांनी अनिल परब यांच्यावरही टीकास्त्र सोडलं. 'ज्यांची स्वतःची बेकायदेशीर बांधकामे आहेत, त्यांनी आरोप करू नये. मी अनिल परब यांना एक संधी देईन. अनिल परब हे वकील आहेत त्यांनी सत्यता पडताळावे त्यांनी आरोप मागे नाही घेतले तर वकिलांशी बोलून त्यांच्यावर कारवाई करू, असा इशारा शंभूराज देसाई यांनी केला.

'मुख्यमंत्री, अब्दुल सत्तार,संजय राठोड आणि माझ्यावर आरोप केले पण पुरावा नाही. शिल्लक सेनेच्या आमदाराचा त्यांच्या नेत्यांना दाखवण्यासाठी आरोप होतोय. त्यांना आम्ही केलेल्या उठावाचा धक्का बसला म्हणून हे शिल्लक सेनेचे अनिल परब आरोप करत आहेत, असा हल्लाबोल शंभूराज देसाई यांनी केला.