गिरीश कांबळे, प्रतिनिधी

Babanrao Gholap News:

ठाकरे गटाच्या शिर्डी लोकसभा मतदार संघाचा तिडा आणखी वाढण्याची शक्यता निर्माण झाली आहे. मातोश्रीवर आज शिर्डी लोकसभा मतदार संघावर चर्चा करण्यासाठी बैठक बोलावण्यात आली होती. या बैठकीला माजी खासदार भाऊसाहेब वाकचौरे पोहचले तर ठाकरे गटाचे उपनेते बबनराव घोलप गैरहजर राहिले. यावर बैठकीचे आमंत्रण नसल्याचे स्पष्टिकरण घोलप यांनी दिले आहे.

याबाबत सविस्तर माहिती अशी की, काही दिवसांपूर्वीच भाऊसाहेब वाकचौरे (Bhausaheb Vakchoure) यांनी ठाकरे गटात प्रवेश केला होता. त्यानंतर पक्षाकडून मला शिर्डी लोकसभा मतदार संघांत तयारी करायला सांगण्यात आले आहे असे वाकचौरे म्हणाले होते.

तसेच उद्धव ठाकरे (Uddhav Thackeray) यांच्या अहमदनगर (Ahmednagar) दौऱ्यातही ते वाकचौरेंना प्रमोट करत असल्याच्या चर्चा रंगल्या होत्या. त्यावरुनच नाराजी दर्शवत बबनराव घोलप यांनी पक्षाच्या उपनेतेपदाचा राजीनामा दिला होता. खासदार संजय राऊतांकडे (Sanjay Raut) आपली नाराजीही त्यांनी बोलून दाखवली होती.

आजच्या बैठकीत यावर तोडगा निघण्याची शक्यता व्यक्त केली जात होती. मात्र बबनराव घोलप मातोश्रीवर (Matoshree) गैरहजर राहिल्याने त्यांची नाराजी दुर झाली नसल्याचे बोलले जात आहे. दरम्यान, संजय राऊत यांच्या भेटीत त्यांनी वाकचौरेंना उमेदवारी द्यायची होती तर मला आश्वासन का दिले? माझे संपर्क प्रमुखपद का काढून घेण्यात आले.. असे म्हणत आपली नाराजी व्यक्त केली होती. (Latest Marathi News)