Hingoli Earthquake News : मराठवाड्यातील हिंगोली जिल्ह्याला पुन्हा एकदा भूकंपाचा जोरदार हादरा बसला आहे. आज सकाळी ११ वाजून २६ मिनिटांनी हिंगोली शहर आणि परिसराला हा धक्का जाणवला. भूमापक केंद्रावर या भूकंपाची तीव्रता ३.५ रिश्टर स्केल इतकी नोंदवण्यात आली आहे. वर्षभरात हिंगोलीमध्ये भूकंपाचे ७ धक्के जाणवल्याची माहिती समोर आली.

या भागात बसले धक्के

मिळालेल्या प्राथमिक माहितीनुसार, हिंगोली शहरासह वसमत आणि औंढा नागनाथ परिसरात भूकंपाचे तीव्र धक्के जाणवले. सकाळी अचानक बसलेल्या या धाडक्यामुळे अनेक घरांवरील पत्रे आणि भांडी वाजली.या भूकंपामुळे अद्याप कोणत्याही प्रकारच्या जीवित किंवा वित्तहानीचे वृत्त नाही. मात्र, प्रशासनाकडून नागरिकांना सतर्क राहण्याचे आवाहन करण्यात येत आहे.

नागरिकांमध्ये प्रचंड भीतीचे वातावरण

हिंगोली आणि वसमत परिसर हा गेल्या काही महिन्यांपासून सातत्याने होणाऱ्या भूकंपाच्या धक्क्यांमुळे संवेदनशील बनला आहे. आज पुन्हा एकदा जोरदार हादरा बसल्याने नागरिकांमध्ये प्रचंड भीतीचे वातावरण निर्माण झाले. सुरक्षेचा उपाय म्हणून अनेक नागरिक तात्काळ आपापल्या घराबाहेर आणि दुकानाबाहेर पडले.

घरांना पडल्या भेगा; व्हिडिओ समोर

या भूकंपाची तीव्रता अधिक असल्याने परिसरातील काही घरांना आणि भिंतींना भेगा पडल्याची माहिती समोर येत आहे. अनेक भागांतून घरांना तडे गेल्याचे फोटो आणि व्हिडिओ सोशल मीडियावर व्हायरल झाले असून, यामुळे परिसरातील नागरिकांमध्ये चिंतेचे आणि भीतीचे वातावरण अधिकच वाढले आहे.