अक्षय बडवे, साम टीव्ही

Vaishnavi Hagawane news : वैष्णवी हगवणे आत्महत्या प्रकरणानंतर संपूर्ण महाराष्ट्रभर संताप व्यक्त केला जात आहे. वैष्णवीच्या आत्महत्येस जबाबदार असणाऱ्या हगवणे कुटुंबावर कठोर कारवाईची मागणी केली जात आहे. वैष्णवीच्या आत्महत्येने पुरोगामी महाराष्ट्रातील क्रूर हुंडा पद्धतीचं वास्तव पुन्हा एकदा समोर आलं आहे. या घटनेच्या विरोधात सर्वसामान्यांकडून निषेध नोंदवला जात आहे. आता वैष्णवी हगवणे प्रकरणावर दिग्दर्शक प्रवीण तरडे यांनी संताप व्यक्त केला आहे.

पुण्यातील हगवणे कुटुंबाचे नवनवीन कारनामे समोर येत आहेत. वैष्णवीच्या मृत्यूनंतर हगवणे कुटुंबाच्या छळछावणीचं धक्कादायक वास्तव उघडकीस आलं आहे. या प्रकरणी पोलिसांनी तिघांवर कारवाई केली आहे. वैष्णवीसोबत मोठी सून मयुरीचाही छळ करण्यात आल्याची माहिती हाती आली आहे. त्यामुळे हगवणे कुटुंबाचे काळे कारनामे समोर येत आहेत.

याच हगवणे कुटुंबाने वैष्णवीच्या आई-वडिलांकडून ५१ तोळे सोने आणि अलिशान गाडी आणि बरंच काही हुंड्यात घेतलं होतं. हुंडा देऊनही वैष्णवीच्या यातना संपल्या नाही. त्यानंतर वैष्णवीने १६ मे रोजी मृत्यूला कवटाळलं. याच घटनेवर दिग्दर्शक प्रवीण तरडे यांनी सोशल मीडियावर पोस्ट लिहून संताप व्यक्त केला.

हगवणे कुटुंबीयांनी हुंड्याच्या पैशांमधून उभारलेली प्रॉपर्टी पेटवून द्या, अशी संतप्त पोस्ट प्रवीण तरडे यांनी केली. पिंपरी चिंचवड येथील वैष्णवी हगवणे प्रकरण सध्या सुरू असताना प्रवीण तरडे यांची संतप्त प्रतिक्रिया दिली आहे. कुणा बहिणींचा असा छळ सुरू असेल तर पुढे येऊन बोला, असे आवाहन सुद्धा प्रवीण तरडे यांनी केलं आहे. फेसबुकवर प्रवीण तरडे यांच्या पोस्टची जोरदार चर्चा सुरु झाली आहे.

काय आहे प्रवीण तरडे यांची पोस्ट?

प्रवीण तरडे म्हणाले,'हुंड्याच्या पैशांमधून उभारलेली घरंदारं प्रॉपर्टी पेटवून द्या. कुणा बहिणींचा असा छळ चालू असेल तर पुढे येऊन बोला. समाज म्हणून आम्ही तुमच्या पाठीशी आहोत'.