अजित पवारांनी साप पोसलेत, अशा शब्दात मनोज जरांगेंनी भुजबळांवर हल्लाबोल केलाय.. आणि त्याला कारण ठरलंय अजित पवारांनी पक्षाच्या बैठकीत भुजबळांच्या भुमिकेवर व्यक्त केलेली नाराजी... मंत्री छगन भुजबळांनी आझाद मैदानावर मराठा आरक्षणाच्या जीआरबाबत मांडलेल्या भुमिकेवरुन पक्षाच्या बैठकीत अजित पवारांनी भुजबळांसमोरच नाराजी व्यक्त केल्याची माहिती सुत्रांनी दिलीय...

मंत्रिमंडळाच्या बैठकीनंतर रात्री अजित पवारांच्या राष्ट्रवादीच्या नेत्यांची बैठक झाली. काही नेते विशिष्ट जातीबद्दल टोकाची भूमिका घेतात.. त्यामुळं या नेत्यांचं मत हे पक्षाचं मत असल्याची चुकीची प्रतिमा बनते... त्याची पक्षाला किंमत मोजावी लागते, अशा शब्दात अजित पवारांनी भुजबळांसमोरच नाराजी व्यक्त केली..

हाच धागा पकडून अजित पवारांनी नेते नाही तर साप पोसलेत, अशा शब्दात जरांगेंनी भुजबळांसह मुंडेंवर निशाणा साधलाय..एवढंच नाही तर बीडमध्ये होणारा ओबीसींचा मेळावा अजित पवार पुरस्कृत असल्याची टीकाही जरांगेंनी केलीय..

दुसरीकडे जरांगेंकडून ओबीसी नेत्यांना पाडण्याचा वारंवार इशारा दिला जात असतानाच भुजबळांनीही आझाद मैदानातून जशास तसं उत्तर देण्याची भाषा केलीय...

आतापर्यंत जरांगेंकडून छगन भुजबळ, धनंजय मुंडे, पंकजा मुंडे आणि मुख्यमंत्री फडणवीसांवर टीका केली जात होती.. मात्र जरांगेंनी आपला मोर्चा उपमुख्यमंत्री अजित पवारांकडे वळवल्याने त्याचा आगामी स्थानिक स्वराज्य संस्थांच्या निवडणुकीत अजित पवारांच्या राष्ट्रवादीला फटका बसणार की ओबीसी मतांच्या धृवीकरणामुळे फायदा होणार? याकडे राज्याचं लक्ष लागलंय.