अक्षय शिंदे| जालना, ता. १८ सप्टेंबर
Manoj Jarange Patil Hunger Strike Protest Jalna: विधानसभा निव़़डणुकांच्या आधी राज्य सरकारला शेवटची संधी आहे, असे म्हणत मनोज जरांगे पाटील यांनी पुन्हा एकदा आरक्षणाचे अस्त्र उपसले आहे. जालन्यामध्ये सुरु असलेल्या जरांगे पाटील यांच्या उपोषणाचा आज दुसरा दिवस असून त्यांची प्रकृती खालावल्याचे समोर आले. आज सकाळी आरोग्य विभागाच्या डॉक्टरांच्या पथकाने त्यांची तपासणी केली.
यावेळी जरांगे यांची शुगर डाऊन झाली असून ब्लड प्रेशर आणि ऑक्सिजन लेवल नॉर्मल असल्याचे डॉक्टरांनी सांगितले. जरांगे यांचा अशक्तपणा वाढला असल्याने त्यांना उपचार घेण्याची विनंती यावेळी डॉक्टरांनी केली मात्र त्यासाठी त्यांनी नकार दिला. तसेच यावेळी मराठा आरक्षणावरुन त्यांनी राज्य सरकारला पुन्हा एकदा इशारा दिला आहे.
"एक वर्ष झालं आम्ही सरकारला सहकार्य करत आहोत. अजून किती दिवस तुम्हाला सहकार्य करायंच? फडणवीस साहेबांनी आमच्या मागणीची तातडीने अंमलबजावणी केली पाहिजे, आमच्या व्याख्येप्रमाणे सगे सोयरेची अंमलबजावणी तातडीने केली पाहिजे. तसेच हैद्राबादसह, सातारा, बाँम्हे हे तिन्ही गॅजेट दोन-तीन दिवसाच्या आत लागू करा, ही सरकारची जबाबदारी आहे. मी राजकीय भाषा बोलत नाही पण माझ्या मागण्या दोन दिवसात पूर्ण करत नाही तर येत्या काळात तुम्हाला अवघड दिवस असणार आहेत," असा थेट इशारा जरांगे पाटील यांनी दिला.
"फडणवीस साहेबांना संधी दिली आहे त्यांनी आमच्या मागण्यांकडे विशेष लक्ष घालावे. नाहीतर मराठ्यांचे कल्याण न होऊन द्यायला फडणवीस दोषी असतील. गरिबांवर मराठ्यांवर अन्याय करणारा फडणवीसंच आहे, आम्हाला राजकारणाशी देणंघेणं नाही, पण नंतर मला पाडापाडी कशी झाली? उभे कसे केले असं म्हणायचं नाही. या दोन-तीन दिवसात सगळे विषया मार्गी लावा. संधी दिली त्याची फडणवीस साहेबांनी सोने करावे. धनगर, मुस्लिम, शेतकरी यांना सरकारने नुसतं वेड्यात काढले आहे, मागणी मान्य करा नाहीतर 2024 ला राजकीय करिअर उद्ध्वस्त करून टाकेल?" असा घणाघातही जरांगे पाटील यांनी केला.
"भारतात अशी एकही जात नसेल की त्यांनी सरकारला वर्षभर सहकार्य केले, कशाला सत्ता चालवता. त्यांना वाईट वाटायला पाहिजे की गेली एक वर्षापासून आंदोलन सुरू आहे. मुख्यमंत्री म्हणतायेत ना पोटात काही नाही ओठात काही नाही, फडणीस यांचे ऐकून आमचा समाज संपून असं नाही ना? मी चार-पाच दिवसात राजकीय बोललो नाही फडणवीस यांना संधी दिली. तुम्ही म्हणता दुसऱ्यांना फायदा झाला, तुम्ही आरत्रण देणारच नाही तर तुम्हाला फायदा कसा होणार? मराठ्यांचे पोर गप्प बसू शकत नाही, 2024 ला कार्यक्रमच लावणार," असेही मनोज जरांगे पाटील यावेळी म्हणाले.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.