मराठा आरक्षणासाठी लढणारे मनोज जरांगेंनी आंदोलनाच्या वर्षपूर्तीच्या मुहुर्तावर पुन्हा एकदा सरकारला आमरण उपोषणाचा इशारा दिला आहे. 28 सप्टेंबरपर्यंत मराठा आरक्षणाचा निर्णय़ न घेतल्यास 29 सप्टेंबरपासून आमरण उपोषणाचा निर्धार जरांगेंनी केलाय. जोपर्यंत मराठा समाजाला आरक्षण मिळणार नाही तोपर्यंत हे उपोषण सुरूच राहणार असं त्यांनी जाहीर केलं. मात्र मनोज जरांगे यांच्या या निर्णयाला आंतरवाली सराटीतल्या मराठा आंदोलकांनी विरोध करत उपोषणाचा निर्णय मागे घेण्याची मागणी केलीय.

मराठा आरक्षणासाठी सुरु करण्यात आलेल्या आंदोलनाला वर्ष झाले. मात्र कुणबी दाखल्यांव्यतिरीक्त जरांगेंच्या हाती काही लागलेलं नाही. ओबीसी प्रवर्गातून मराठा समाजाला आरक्षण मिळावे या मागणीसाठी म्हणून जरांगे यांनी 29 ऑगस्ट 2023 रोजी जालना जिल्ह्यातील अंतरवाली सराटी मधून आंदोलन सुरू केलं होतं.

या आंदोलनाची वर्षपूर्ती झाल्याच्या निमित्तानं मनोज जरांगेंनी गोदापट्ट्यातील 123 गावांच्या आंदोलक समन्वयकांची बैठक बोलावली होती. त्यानंतर त्यांनी पुन्हा एकदा आंदोलन करणार असल्याचं जाहीर केलं. यावेळी त्यांनी पुन्हा एकदा उपमुख्यमंत्री देवेंद्र फडणवीसांवर टीका केली.

गेल्या वर्षभरात जरांगेंनी अनेक अल्टीमेटम सरकारला दिले आणि सरकारला घामही फोडला. मात्र जरांगेंच्या हाती वर्षभरात कुणबी दाखल्यांखेरीज बाकी काहीही लागलेलं नाही..आता ऐन विधानसभेच्या तोंडावर जरांगे पुन्हा सरकारला अल्टीमेटम देतायत. त्यामुळे यंदा सरकार झुकणार की जरांगे अल्टीमेटमवर अल्टिमेटम सुरूच राहणार याकडे राज्याचं लक्ष लागलंय.