महायुती सरकारचे क्रीडा मंत्री आणि राष्ट्रवादीचे नेते माणिकराव कोकाटे यांच्या अडचणी कमी होताना दिसत नाहीयेत. शासकीय कोट्यातील 10 टक्के सदनिका गैरव्यवहार प्रकरणात कोकाटे यांना अटक होण्याची शक्यता आहे. अटकेच्या शक्यतेसह कोकाटेंचे मंत्रीपद देखील धोक्यात आले आहे. कारण प्रथम वर्ग न्यायालयाने दिलेली शिक्षा, जिल्हा सत्र न्यायालयाकडून कायम ठेवण्यात आलीय.

आर्थिक उत्पन्नाचे बनावट दस्तावेज तयार करून मुख्यमंत्र्यांच्या १० टक्के राखीव कोट्यातून सदनिका लाटल्याप्रकरणी कोकाटे यांना २ वर्षांचा कारावास आणि १० हजार रुपये दंडाची शिक्षा न्यायालयाने सुनावली होती. कोकाटे यांनी नाशिकच्या कॉलेजरोड परिसरातील सदनिका लाटल्याचा आरोप आहे. याप्रकरणी नाशिक जिल्हा न्यायालयाने फेब्रुवारी महिन्यातील २० तारखेला शिक्षा ठोठावली होती. मात्र त्यानंतर त्यांना जामीनदेखील मंजूर झाला होता.

दिवंगत माजी राज्यमंत्री तुकाराम दिघोळे यांनी १९९५ मध्ये माणिकराव कोकाटे आणि त्यांच्या भावाविरोधात गुन्हा दाखल केला होता. त्यांनी कागदपत्रांमध्ये फेरफार करत फसवणूक केल्याचा आरोप दिघोळे यांनी केला होता. त्यावरून कोकाटेंविरुद्धात खटला सुरू होता. कमी उत्पन्न असणाऱ्या व्यक्तीला मुख्यमंत्री कोट्यातून कमी दरात सदनिका घेताना स्वतःच्या नावावर कुठेही सदनिका नसल्याचे प्रतिज्ञापत्र व आवश्यक माहिती सादर करावी लागते.

असे असताना क्रीडामंत्री कोकाटे व त्यांचे बंधू विजय कोकाटे यांनी कागदपत्रे सादर करून शहरातील कॅनडा कॉर्नर भागातील निर्माण व्ह्यू अपार्टमेंटमध्ये मुख्यमंत्री कोट्यातून दोन सदनिका प्राप्त केल्या होत्या. या इमारतीतील अन्य दोन सदनिका इतरांनी मिळवल्या. त्याचा वापर कोकाटे बंधूंकडून केला जात होता.

या संदर्भात तक्रारी झाल्यानंतर १९९७ मध्ये जिल्हा प्रशासनाने चौकशी केली. त्यानंतर माणिकराव कोकाटे, त्यांचे बंधू विजय कोकाटे यांच्यासह चार जणांविरुद्ध गु्न्हा दाखल करण्यात आला. सरकारवाडा पोलीस ठाण्यात फसवणुकीचा गुन्हा दाखल करण्यात आला होता. या खटल्याचा निकाल २९ वर्षांनी लागला.