रणजित माजगावकर, साम टीव्ही

कोल्हापूर: प्रेमात आणि युद्धात सर्वकाही माफ असते असे म्हणतात. लैला मजनू, रोमि ज्युलियट इथपासून ते ताजमहालच्या बांधकामापर्यंत प्रेमाचे महत्त्व सांगितले जाते. परंतु प्रेयसीला मिळविण्यासाठी प्रियकराने थेट अघोरी विद्येचा आधार घेतल्याचा प्रकार कोल्हापूर येथे उघड झाला आहे.

कोल्हापूर: येथील भुदरगड तालुक्यातील आकुर्डे- महालवाडी दरम्यानच्या कुरण शेतात अज्ञात व्यक्तीकडून अघोरी प्रकार करण्यात आल्याची धक्कादायक घटना उघडकीस आली आहे. स्थानिक तरुणांना या ठिकाणी एका बाभळीच्या झाडाला दाभणाने काही मुलींचे फोटो लटकवलेले आढळले. तसेच लिंबू, काळ्या बाहुल्या आणि अन्य साहित्याचा वापर करून जादूटोण्याचा प्रकार झाल्याचे निदर्शनास आले आहे. विशेष म्हणजे, एका युवतीच्या आई, वडील आणि आजीचे फोटोही झाडावर लावलेले होते.

ही माहिती गावात पसरताच ग्रामस्थांमध्ये भीतीचे वातावरण निर्माण झाले. मात्र, अंधश्रद्धा निर्मूलन समितीच्या कार्यकर्त्यांनी त्वरित घटनास्थळी जाऊन सर्व साहित्य झाडावरून काढून टाकले. त्यांनी नागरिकांना घाबरून न जाण्याचे आवाहन करत अशा अंधश्रद्धांना खतपाणी घालू नये, असे स्पष्ट केले.

दरम्यान, हा प्रकार एखाद्या तरुणाने मुलीला वश करण्यासाठी केला असावा, अशी चर्चा परिसरात सुरू आहे. याबाबत स्थानिक पोलिसांना माहिती देण्यात आली असून, पुढील तपास सुरू आहे. ग्रामस्थांनी अशा प्रकारांवर विश्वास न ठेवावा आणि संशयास्पद हालचाली दिसल्यास पोलिसांना त्वरित कळवावे, असे आवाहन करण्यात आले आहे