विधानसभा निवडणुकीच्या पार्श्वभूमीवर महाराष्ट्रातलं राजकीय वातावरण तापल्याचं चित्र आहे. अशातच महायुतीत सारं काही अलबेल आहे का? असा प्रश्न आता उपस्थित होतो. त्याला कारण ठरलंय सातत्यानं अजित पवारांवर होणारी टीका. नुकतेच शिवसेनेच्या शिंदे गटाचे नेते तानाजी सावंतांनी अजित पवारांबाबत एक वक्तव्य केलं होतं.

हे प्रकरण मिटत नाही तोच आता भाजपचे प्रवक्ते गणेश हाकेंनी अजित पवार आणि त्यांच्या पक्षाबाबत आक्षेप घेतलाय. त्यामुळे अजित पवार महायुतीतले व्हिलन ठरतायत का? असा सवाल उपस्थित होतोय. गेल्या काही दिवसांत अजित पवारांविरोधात शिंदे गट आणि भाजपनं नेत्यांनी अनेक वक्तव्य केली आहेत.

महायुतीतले 'दादा' व्हिलन ?

लोकसभा निवडणुकीआधी अजित पवारांनी भाजप-शिंदेंसोबत घरोबा केला. लोकसभेत महायुतीला याचा म्हणावा तसा फायदा झाला नाही. उलटपक्षी भाजपने सपाटून मार खाल्ला. यानंतर भाजपची मातृसंस्था असलेल्या संघानं अजित पवारांवर चांगलंच तोंडसुख घेतलं. अजित पवारांच्या प्रवेशानं भाजपला फटका बसल्याचा सूर संघ समविचारी मासिकांमधून आळवण्यात आला. त्यानंतर सातत्यानं कधी शिंदे गट तर कधी भाजपमधून अजित पवारांना टार्गेट केलं जातंय. याआधी रामदास कदमांनी जाहीर भाषणात अजित पवारांना लक्ष्य केलं होतं. रामदास कदम म्हणाले होते की, अजितदादा थोडे उशिरा आले असते तर

दरम्यान,अजित पवारांना लक्ष्य करायचं आणि तिसरी आघाडी स्थापन करुन मतांचं विभाजन करण्याचा डाव महायुती आखत असल्याच्या चर्चा राजकीय वर्तुळात रंगतायत. दरम्यान अजित पवारांनी या चर्चांना मी फार महत्त्व देत नसल्याचं म्हटलंय.

अजित पवारांवर सातत्यानं टीका केली जातेय. विधानसभेला अद्याप वेळ आहे. अशात महायुतीत जागावाटपाच्या चर्चेलाही सुरुवात झालेली नाही. त्यामुळे नाराजीला नक्कीच वाव आहे. त्यामुळे अजित दादा महायुतीचा धर्म पाळणार की, बाहेरची वाट धरणार हेच पाहायचं.