सुशांत सावंत

Maharashtra Winter session : राज्य विधिमंडळाचे हिवाळी अधिवेशन (Winter Session) आजपासून सुरू होत आहे. या अधिवेशनात राज्य सरकारला कोंडीत पकडण्यासाठी विरोधकांकडून खास रणनीती ठरवण्यात आली आहे. त्याच दरम्यान शिंदे- फडणवीस सरकारनेही विरोधकांच्या रणनितीला प्रतिउत्तर देण्यासाठी खास योजना आखली आहे. विरोधकांनी गोधळ घातल्यास विरोधकांची अनेक प्रकरणे सरकार बाहेर काढ्याच्या पावित्र्यत आहे.

महाराष्ट्र राज्य विधीमंडळाचे अधिवेशन आजपासून नागपुरात सुरू झाले आहे. महाविकास आघाडी आक्रमक झाल्याचे दिसले. तर दुसरीकडे आक्रमक झालेल्या विरोधकांना सरकारकडून 'जशास तसे' उत्तर देण्याची तयारी सुरू केली आहे. विविध मुद्द्यांवरून हे अधिवेशन वादळी ठरणार आहे. ते आज पहिल्याच दिवशी दिसून आले.

हिवाळी अधिवेशनात मुख्यमंत्री एकनाथ शिंदे आणि उद्धव ठाकरे आमने सामने येणार आहे. आदित्य ठाकरे देखील नागपूरमध्ये दाखल झाले आहेत. या अधिवेशनात महाराष्ट्रातील महापुरुषांच्या अवमानावरून आणि सीमा प्रश्नावरून सरकारला घेरण्याचा इशारा विरोधकांनी दिला आहे. लोकायुक्त कायद्याचं विधेयकदेखील अधिवेशनात मांडण्यात येणार आहे.

अधिवेशनाच्या पहिल्याच दिवशी विरोधकांचं पायऱ्यांवर आंदोलन

राष्ट्रवादी काँग्रेसच्या नेत्यांसह विरोधी पक्षांच्या नेत्यांनी पहिल्याच दिवशी विधानसभेच्या पायऱ्यांवर आंदोलन केले. यावेळी सरकारच्या विरोधात जोरदार घोषणाबाजी केली.राष्ट्रवादी काँग्रेस, काँग्रेस आणि शिवसेना (उद्धव बाळासाहेब ठाकरे) गटाच्या आमदारांनी पहिल्याच दिवशी शिंदे आणि फडणवीस सरकारला घेरण्याचा प्रयत्न केला. विधानसभांच्या पायऱ्यांवर विरोधी पक्षाच्या नेत्यांनी जोरदार घोषणाबाजी केली. ५० खोके, एकदम ओके अशा घोषणांचे बॅनर घेऊन जोरदार घोषणाबाजीही केली.