राज्यातील अनेक जिल्ह्यात गेल्या काही दिवसांपासून पडणाऱ्या अवकाळी पावसाने झोडपून काढले आहे. या पावसामुळे अनेक ठिकाणी शेत पिकांचे आणि घरांचे मोठे नुकसान झाले आहे. अशामध्ये आता हवामान खात्याने राज्यातील अनेक जिल्ह्यांमध्ये वादळी वाऱ्यासह मुसळधार पाऊस पडण्याचा इशारा दिला आहे. त्यामुळे आज आणि उद्याचा दिवस खूपच महत्वाचा असणार आहे. अशामध्ये नागरिकांनी आणि शेतकऱ्यांनी घराबाहेर पडताना काळजी घ्यावी, असे आवाहन केले जात आहे.

आज आणि उदया महत्वाचा -

मुंबई हवामान खात्याने आज आणि उद्याच्या हवामानाचा अंदाज वर्तवला आहे. त्यानुसार, दक्षिण कोकण, मध्य महाराष्ट्रात काही ठिकाणी तर उत्तर कोकण आणि मराठवाड्यात तुरळक ठिकाणी मंगळारी मेघगर्जनेसह पाऊस पडण्याची शक्यता हवामान खात्याने वर्तवली आहे. तर बुधवारी दक्षिण मध्य महाराष्ट्रात काही ठिकाणी, कोकण, उत्तर मध्य महाराष्ट्र आणि मराठवाड्यात तुरळक ठिकाणी मेघगर्जनेसह पाऊस पडण्याची शक्यता वर्तवली आहे.

मंगळवारचा हवामानाचा अंदाज -

मंगळवारी रायगड, ठाणे, मुंबई, पालघर, रत्नागिरी, सिंधुदुर्ग, नंदुरबार, धुळे, सांगली, सोलापूर, सातारा, धाराशिव, जालना, परभणी, लातूर या जिल्ह्यात तुरळक ठिकाणी विजांचा कडकडाट, ढगांचा गडगडाट आणि वादळी वाऱ्यासह पाऊस पडण्याची शक्यता आहे. यावेळी ४० ते ५० किमी प्रतितास वेगाने वारे वाहण्याची शक्यता आहे. तर पुणे, अहमदनगर, नाशिक, कोल्हापूर, बीड, छत्रपती संभाजीनगर या जिल्ह्यातील तुरळक ठिकाणी विजांचा कडकडाट, मेघगर्जना, गारपीट आणि वादळी वाऱ्यासह पाऊस पडण्याची शक्यता आहे. यावेळी ५० ते ६० किमी प्रतितास वेगाने वारे वाहण्याची शक्यता आहे.

बुधवारचा हवामानाचा अंदाज -

बुधवारी रायगड, रत्नागिरी, सिंधुदुर्ग, पुणे, अहमदनगर, कोल्हापूर, सांगील, सोलापूर, सातारा, बीड, धाराशिव आणि जालना या जिल्ह्यातल्या तुरळक ठिकाणी विजांचा कडकडाट, ढगांचा गडगडाट आणि वादळी वाऱ्यासह पाऊस पडण्याची शक्यता आहे. यावेळी ४० ते ५० किमी प्रतितास वेगाने वारे वाहण्याची शक्यता आहे. तर नाशिक, जळगाव, छत्रपती संभाजीनगर जिल्ह्यामध्ये तुरळक ठिकाणी विजांचा कडकडाटा, मेघगर्जना, गारपीट आणि वादळी वाऱ्यासह पाऊस पडण्याची शक्यता आहे. यावेळी ५० ते ६० किमी प्रतितास वेगाने वारे वाहण्याची शक्यता आहे.