Maharashtra Rain: राज्यात पावसाचा धुमाकूळ सुरूच आहे. गेल्या काही दिवसांपासून पडणाऱ्या पावसाने राज्यातील शेतीचं मोठं नुकसान झालंय. हजारो हेक्टरवरील शेतीचं नुकसान झाल्यामुळे बळीराजा चिंतेत आला आहे. मुंबई-पुण्यात पावसाने विश्रांती घेतली असली तरी देखील राज्यभरात सगळीकडे जोरादार पाऊस झाला. आज देखील राज्यात काही ठिकाणी पावसाचा जोर कायमच राहणार आहे. हवामान खात्याने आज विदर्भाला पावसाचा येलो अलर्ट दिला आहे. तर उर्वरीत राज्यात काही ठिकाणी हलका पाऊस पडण्याची शक्यता आहे.

हवामान खात्याने दिलेल्या माहितीनुसार, आज विदर्भातील अमरावती, चंद्रपूर, भंडारा, गोंदिया जिल्ह्यात जोरदार पावसाची शक्यता आहे. तसंच बुलडाणा, अकोला, वाशिम, यवतमाळ, वर्धा, नागपूर या जिल्ह्यांमध्ये विजांच्या कडकडाटासह पाऊस पडण्याची शक्यता आहे. या सर्व जिल्ह्यांना हवामान खात्याने येलो अलर्ट दिला आहे. तर, मराठवाड्यातील बीड, लातूर, परभणी, हिंगोली, नांदेड या सर्व जिल्ह्यात विजांच्या कडकडाटासह पाऊस पडण्याची शक्यता आहे. तसंच, उर्वरित राज्यात तुरळक ठिकाणी हलका पाऊस पडण्याचा अंदाज आहे.

मुंबई शहर, मुंबई उपनगर, ठाणे, पालघर याठिकाणी पावसाचा जोर ओसरला आहे. पाऊस नसल्यामुळे या ठिकाणी उकाडा पुन्हा वाढू लागला आहे. त्यामुळे मुंबईकर हैराण झाले आहेत. आज मुंबई आणि कोकणात तापमानात काहिशी वाढ होण्याची शक्यता आहे. तर या ठिकाणी केव्हा तरी मधून अधून पाऊस पडण्याची शक्यता आहे. मुंबईकरांचे तर उकाड्यामुळे पुन्हा हाल होऊ लागले आहे. घामांच्या धारामुळे मुंबईकर हैराण झाले आहेत.

दरम्यान, पुढचे ३ दिवस कोकण-गोवा, मध्य महाराष्ट्र आणि मराठवाड्यासाठी महत्वाचे राहणार आहेत. या ठिकाणी विजांच्या कडकडाटासह मुसळधार पाऊस पडण्याची शक्यता आहे. २९ मे ते २ जून या कालावधीमध्ये मध्य महाराष्ट्र आणि कोकणात जोरादर पावसाची शक्यता आहे. इथे अनेक ठिकाणी पावसाची ये-जा सुरूच राहणार आहे.