Maharashtra Legislative Council election 2026 schedule : महाराष्ट्राच्या राजकीय वर्तुळातून एक मोठी बातमी समोर आली आहे. राज्यातील प्रदीर्घ काळापासून प्रलंबित असलेल्या विधान परिषदेच्या (Legislative Council) १६ जागांसाठी द्वैवार्षिक निवडणूक (Local Authorities' Constituencies) जाहीर झाली आहे. ६ जागा स्थानिक स्वराज्य संस्था मतदारसंघातल्या आहेत. निवडणूक आयोगाने जाहीर केलेल्या कार्यक्रमानुसार येत्या १८ जून रोजी या जागांसाठी मतदान प्रक्रिया पार पडणार आहे.

कोणत्या १६ जिल्ह्यात होणार निवडणुका ?

विधान परिषदेच्या ज्या १६ आमदारांच्या जागा भरल्या जाणार आहेत, त्यामध्ये सोलापूर, अहमदनगर, ठाणे, जळगाव, सांगली-सातारा, नांदेड, यवतमाळ, पुणे, भंडारा-गोंदिया, रायगड-रत्नागिरी-सिंधुदुर्ग, नाशिक, वर्धा-गडचिरोली, अमरावती, उस्मानाबाद, परभणी आणि संभाजीनगर या जिल्ह्यांचा समावेश आहे. 'या' १६ मतदारसंघांमध्ये होणार निवडणूक आणि आचारसंहिता लागू निवडणूक जाहीर झाल्यामुळे संबंधित मतदारसंघांमध्ये आचारसंहिता (Model Code of Conduct) तातडीने लागू झाली आहे.

निवडणुकीचे संपूर्ण वेळापत्रक

अधिकृत अधिसूचना जारी होणार - २५ मे २०२६ (सोमवार)

उमेदवारी अर्ज भरण्याची शेवटची तारीख - ०१ जून २०२६ (सोमवार)

उमेदवारी अर्जांची छाननी - ०२ जून २०२६ (मंगळवार)

अर्ज मागे घेण्याचा शेवटचा दिवस - ०४ जून २०२६ (गुरूवार)

मतदान (Date of Poll) -१८ जून २०२६ (गुरूवार) (सकाळी ८ ते दुपारी ४)

मतमोजणी (Counting of Votes) - २२ जून २०२६ (सोमवार)

निवडणुका का रखडल्या होत्या?

नियम आणि अटींनुसार, स्थानिक स्वराज्य संस्था मतदारसंघातून आमदार निवडून आणण्यासाठी तिथल्या किमान ७५% लोकल बॉडीज (स्थानिक संस्था) भरलेल्या असणे आवश्यक असते. महाराष्ट्रात गेल्या काही काळापासून स्थानिक स्वराज्य संस्थांच्या निवडणुका न झाल्यामुळे या जागा रिक्त होत्या आणि निवडणुका रखडल्या होत्या. परंतु, आता राज्य निवडणूक आयोगाने याविषयीची आवश्यक ती माहिती केंद्रीय निवडणूक आयोगाला कळवली आहे. स्थानिक स्वराज्य संस्थांच्या रचनेची अट पूर्ण झाल्यानंतर आता केंद्रीय निवडणूक आयोगाने या १६ जागांसाठी अधिकृतपणे बिगुल फुंकले आहे. या निवडणुकीमुळे राज्यातील स्थानिक पातळीवरील राजकीय वातावरण पुन्हा एकदा चांगलेच तापणार आहे.