राज्यात दुष्काळामुळे शेतकऱ्यांवर स्थलांतर करण्याची वेळ आलीये. पोटाची खळगी भरण्यासाठी आणि तहान भागवण्यासाठी दुष्काळग्रस्त भागातून मोठ्या प्रमाणावर शेतकरी कामाच्या शोधात शहराची वाट धरताना दिसतायत. घर सोडण्याची वेळ आल्यामुळे आता मराठवड्यातली गावं ओस पडू लागली आहेत. दुष्काळात होरपळून निघालेल्या बीडच्या गेवराई तालुक्यातील तांदळा गाव निर्मनुष्य होणार की काय अशी भीती आता वाटू लागलीय. कारण 1400 लोकसंख्या असलेल्या या गावातून 900 लोकांनी पोटापाण्यासाठी स्थलांतर केलंय. गावामध्ये घरांना टाळं लागलंय तर गावात वयोवृद्ध नागरिकांशिवाय कुणीही दिसेनासं झालंय.

एव्हंढच नव्हे तर दुष्काळामुळे शेतीसह पिण्याच्या पाण्याचा प्रश्नही गंभीर झालाय. नद्या आणि विहिरी कोरड्याठाक पडल्यानं महिलांनी संताप व्यक्त केलाय. चाऱ्याअभावी आणि भीषण उष्णतेमुळे मेंढ्यांचे आरोग्य खालावत असून मेंढपाळ बांधव मोठ्या आर्थिक संकटात सापडलेत.

दुष्काळाचा परिणाम फक्त शेती आणि पाण्यापुरता मर्यादित नाहीये. वाढत्या आर्थिक नुकसानीमुळे आता तरुण-तरुणींची लग्नही खोळंबली आहेत. अनेक शेतकऱ्यांवर लग्नं लांबणीवर टाकण्याची वेळ आलीये. दुष्काळाची दाहकता दिवसेंदिवस वाढत चाललीय. आता बीडची गाव ओस पडू लागली असली तरी हे लोण संपूर्ण मराठवाडा आणि विदर्भात पोहचण्याची शक्यता आहे. दुष्काळग्रस्तांवर घराला टाळ लावून आणि गाव सोडण्याची वेळ येऊ नये यासाठी सरकारनं तातडीनं पुरेशी आर्थिक मदत देण्याची गरज आहे.