Uddhav Thackeray : समाजवादी पक्षाचे आमदार अबू आझमी यांना अर्थसंकल्पीय अधिवेशन संपेपर्यंत निलंबित करण्यात आले आहे. त्यांनी औरंगजेब हा क्रूर शासक नव्हता. तो उत्तम प्रशासक होता. औरंगजेब आणि छत्रपती संभाजी महाराज यांच्यात धर्माची लढाई नव्हती असे वक्तव्य केले होते. या वक्तव्यामुळे निलंबित करण्यात आले आहे. या प्रकरणावर उद्धव ठाकरे यांनी प्रतिक्रिया दिली आहे.

'छत्रपती शिवाजी महाराज, छत्रपती संभाजी महाराज यांच्याबद्दल, महाराष्ट्रातील दैवतांबद्दल कोणी अपशब्द काढेल त्याला चांगली अद्दल घडेल अशी शिक्षा झाली पाहिजे. पुन्हा असं बोलण्याची कुणाची हिंमत होता कामा नये. अबू आझमी यांचे कायमचे निलंबन केले पाहिजे असे माझे मत आहे' असे ठाकरे गटाचे प्रमुख उद्धव ठाकरे यांनी म्हटले आहे.

विधानसभा सदस्यांसाठी, आमदारांचा विकी कौशलचा 'छावा' चित्रपट दाखवण्यात आला होता. त्यावर उद्धव ठाकरेंनी भाष्य केले. ते म्हणाले, 'ज्यांची ही कल्पना आहे त्यांचं मी अभिनंदन करतो. महायुतीने छत्रपती संभाजी महाराज यांचा 'छावा' दाखवला. त्यांनी छत्रपती शिवाजी महाराज यांचाही चित्रपट दाखवायला हवा.'

'छत्रपती संभाजी महाराज यांनी धर्मासाठी मेलो तरी बेहत्तर हे नुसतं बोलून नाही तर कृतीतूनही दाखवले. त्या छत्रपती संभाजी महाराज यांचा चित्रपट गद्दारांना दाखवलाच पाहिजे. जे ईडी, इन्कम टॅक्स, सीबीआयच्या भीतीने जे पळून गेले, त्या गद्दारांनी छावा चित्रपट पाहिलाच पाहिजे. महाराजांची गद्दारांनी प्रेरणा घ्यायला पाहिजे', असे वक्तव्य उद्धव ठाकरे यांनी केले.