• ठाकरे गटाला कोकणात धक्का बसला आहे.

• शिवसेना ठाकरे गटातील नेत्याने शिंदे गटात जाण्याचा निर्णय घेतला आहे.

• यामुळे उद्धव ठाकरेंसह भास्कर जाधव यांना हादरा बसला आहे.

Maharashtra : स्थानिक स्वराज संस्थाच्या निवडणूकीसाठी सर्वच पक्षांनी कंबर कसल्याचे पाहायला मिळत आहे. आगामी निवडणूकांसाठी शिवसेना ठाकरे गटाकडून जय्यत तयारी सुरु आहे. शिवसेना ठाकरे गट आणि महाराष्ट्र नवनिर्माण सेना या दोन पक्षांमध्ये निवडणूकांच्या आधीच युती होणार असल्याचे म्हटले जात आहे. एकाबाजूला ठाकरे गटाची मोर्चाबांधणी सुरु असताना ठाकरे गटाला धक्क्यांवर धक्के बसत असल्याचे पाहायला मिळत आहे.

उद्धव ठाकरे यांच्या शिवसेना ठाकरे गटाला मोठा धक्का बसणार आहे. रत्नागिरीच्या गुहागरमधील शिवसेना ठाकरे गटाच्या महिला नेत्या आणि जिल्हा परिषदेच्या माजी सदस्या नेत्रा ठाकूर या उपमुख्यमंत्री एकनाथ शिंदे यांच्या शिवसेनेमध्ये प्रवेश करणार आहेत. उद्धव ठाकरे यांच्यासह भास्कर जाधव यांनाही हा मोठा हादरा असल्याचे म्हटले जात आहे.

नेत्रा ठाकूर या उपमुख्यमंत्री एकनाथ शिंदे यांच्या उपस्थितीमध्ये शिंदे यांच्या शिवसेनेमध्ये प्रवेश करणार आहेत. एकनाथ शिंदे यांच्या नेतृत्त्वात, उदय सामंत यांच्या प्रमुख उपस्थितीमध्ये आणि विपुल कदम यांच्या पुढाकाराने नेत्रा ठाकूर या शिवसेना पक्षात पक्षप्रवेश करणार असल्याची माहिती समोर आली आहे. यामुळे कोकणात ठाकरे गटाला मोठा धक्का बसल्याचे म्हटले जात आहे.

रामदास कदम यांनी नेत्रा ठाकूर यांच्या पक्षप्रवेशावरुन भास्कर जाधव यांच्यावर निशाणा साधला. गुहागरमध्ये नेत्रा ठाकूर यांनी ठाकरे गटातून पक्षांतर करुन शिवसेना शिंदे गटात प्रवेश करण्याचा निर्णय घेतल्याने भास्कर जाधव यांचे नुकसान होणार असल्याचे म्हटले जात आहे. एकेबाजूला पक्षात निवडणूकांसाठी मोर्चेबांधणी सुरु असताना, दुसऱ्या बाजूला पक्षाला गळती होत असल्याचे पाहायला मिळत आहे.