Maharashtra : स्थानिक स्वराज्य संस्थांच्या निवडणुकीसाठी पक्षांनी तयारी सुरु केली आहे. लवकरच आगामी निवडणुकीबाबत घोषणा होईल असे संकेत पाहायला मिळत आहेत. अशातच नंदुरबार जिल्ह्यामध्ये भाजपमध्ये मोठी इनकमिंग सुरु असल्याचे पाहायला मिळत आहे. निवडणुकीच्या आधी शिवसेना शिंदे गटाला नंदुरबारमध्ये धक्का बसला आहे.

मिळालेल्या माहितीनुसार, शिवसेनेच्या तीन माजी नगरसेवकांनी स्थानिक पातळीवरील नेत्यांच्या राजकारणाला वैतागून भाजपमध्ये प्रवेश केला आहे. शिवसेनेचे माजी नगरसेवक प्रमोद बोडके, माजी नगरसेवक जयसिंग राजपूत आणि युवा नेते संदीप चौधरी यांच्यासह अनेक पदाधिकारी आणि कार्यकर्त्यांनी शिंदे गटातून बाहेर पडून भाजपमध्ये प्रवेश केला आहे.

नंदुरबारमध्ये भाजपने शिंदे गटासह शरद पवार यांच्या राष्ट्रवादी काँग्रेस पक्षालाही धक्के दिले आहेत. राष्ट्रवादी काँग्रेस शरद पवार गटाच्या महिला जिल्हाध्यक्षांसह असंख्य कार्यकर्त्यांनी देखील भाजपची वाट धरली आहे. फक्त ३ दिवसांमध्ये शिवसेना शिंदे गट, राष्ट्रवादी काँग्रेस शरद पवार गट आणि काँग्रेस अशा ३ पक्षांना भाजपमुळे धक्के बसले आहेत.

काँग्रेसच्या नंदुरबार जिल्ह्यातील नेत्या डॉ.समिधा नटावदकर यांनी देखील भारतीय जनता पक्षामध्ये प्रवेश केला आहे. फक्त नेते, पदाधिकारीच नाही, तर मोठ्या प्रमाणावर कार्यकर्ते देखील भाजपमध्ये येत असल्याचे चित्र पाहायला मिळत आहे. यामुळे नंदुरबारमध्ये भारतीय जनता पक्षाची ताकद वाढत असल्याचे म्हटले जात आहे.