Sanjay Shirsat statement on NCP merger : राष्ट्रवादी काँग्रेसच्या (अजित पवार गट आणि शरद पवार गट) दोन्ही गटांच्या संभाव्य विलीनीकरणाच्या जोरदार चर्चांवर शिंदे गटाचे मंत्री संजय शिरसाट यांनी मोठे विधान केले आहे. दोन्ही राष्ट्रवादी एकत्र येण्याऐवजी त्यातून तिसराच गट निर्माण होईल की काय, अशी शंका त्यांनी उपस्थित केली आहे. त्यांच्या या वक्तव्यामुळे राजकीय वर्तुळात नवा ट्विस्ट निर्माण झाला आहे.

एकमेकांचे कपडे फाडणाऱ्यांचे विलीनीकरण कसे होणार?

दोन्ही राष्ट्रवादीच्या विलीकरणाच्या चर्चेवर संजय शिरसाट यांनी टोला लगावला. ते म्हणाले, राष्ट्रवादीच्या नेत्यांची सुरुवातच दररोज एकमेकांचे कपडे फाडण्याने होत असेल, तर त्यांचे विलीनीकरण होईल असे अजिबात वाटत नाही. उलट या दोन्ही राष्ट्रवादी मिळून तिसरा गट तयार होतो की काय, अशी शंका वाटत आहे.

तसेच रोहित पवार यांच्या आरोपांचा उल्लेख करत ते म्हणाले की, सध्या दोन्ही राष्ट्रवादीत अंतर्गत कुस्ती सुरू आहे. सकाळी विलीकरणाच्या चर्चा होतात आणि दुपारी एकमेकांवर आरोप केले जातात. त्यामुळे नक्की काय चालले आहे, याचा अंदाज बांधणे आता कठीण झाले आहे.

'गोकुळ' दूध संघाच्या वादावर प्रतिक्रिया

गोकुळ दूध संघाच्या अध्यक्षपदाच्या वादावरही संजय शिरसाट यांनी विधान केले. ते म्हणाले की, हा कायदेशीर पेच सध्या पुढे आणखी वाढण्याची शक्यता आहे. त्यामुळे यावर आताच बोलणे योग्य ठरणार नाही. जोपर्यंत कायदेशीर पेच सुटत नाही, तोपर्यंत दोन्हीपैकी कोणत्याही गटाचे समाधान होणार नाही.

संजय राऊत यांच्या टीकेला उत्तर देताना ते म्हणाले की, कायदेशीर बाबी आणि दोन्ही बाजू सध्या न्यायालयासमोर मांडल्या गेल्या आहेत. त्यांच्या सरकारच्या काळातही त्यांनी असे काही निर्णय घेतले होते.

'राऊत-सरनाईक' भेटीचे समर्थन

शिवसेना (ठाकरे गट) खासदार संजय राऊत आणि आमदार प्रताप सरनाईक यांच्या भेटीवर शिरसाट यांनी भाष्य केलं. ते म्हणाले, सणासुदीच्या काळात सर्वांमध्ये गोडवा कायम असला पाहिजे. वैयक्तिक किंवा राजकीय भांडणे सार्वजनिक जीवनात आणणे योग्य नाही. प्रताप सरनाईक त्यांना भेटले यात काही गैर नाही, मी स्वतःसुद्धा अनेक राजकीय विरोधकांना भेटत असतो.