गेल्या काही दिवसांपासून सांगलीच्या राजकारणात मोठा फेरबदल होणार असल्याची चर्चा होती. राष्ट्रवादी काँग्रेसमधील माजी खासदार संजय काका पाटील भाजपमध्ये प्रवेश करणार असल्याची तुफान चर्चा होती. पण आता संजयकाका पाटील यांच्या भाजप प्रवेशाच्या चर्चांना पूर्णविराम मिळालाय. हा पूर्णविराम दुसरं तिसरं कोणी नाही तर भाजपचे ज्येष्ठ नेते आणि उच्च तंत्र शिक्षण मंत्री चंद्रकात पाटील यांनीच दिलाय. सांगलीत माध्यम प्रतिनिधींशी बोलतांना चंद्रकांत पाटील यांनी संजय पाटील यांच्या पक्षप्रवेशांच्या चर्चांवर आज पडदा टाकला.

संजयकाका पाटील हे अजित पवार यांच्या राष्ट्रवादीत आहेत, त्यांचे तिथेच पुनर्वसन केलं पाहिजे. संजयकाका पाटील हे आमचे जुने नेते व मित्र असल्यामुळे त्यांचा राष्ट्रवादी अजित पवार पक्षात पुनर्वसन व्हावे,यासाठी आम्ही अजित पवारांना मदत करू,अशी भूमिका मंत्री चंद्रकांत पाटलांनी स्पष्ट केली. पण संजय काका पाटील भाजपमध्ये येतील या चर्चांना तथ्य नसल्याचं चंद्रकांत पाटील यांनी म्हटलंय.

काही दिवसांपासून संजय काका पाटलांचा भाजपमध्ये प्रवेश होणार असल्याची चर्चा होती. आज मात्र या चर्चेला अखेर पूर्णविराम मिळालाय. त्याचबरोबर सांगलीचे विद्यमान अपक्ष खासदार विशाल पाटील यांना भाजपसोबत येण्याची ऑफर आपण देतच राहू,असं देखील चंद्रकांत पाटलांनी स्पष्ट केलंय. विद्यमान खासदार विशाल पाटील तरूण तडफदार आहेत. ते संवेदनशील आहेत, त्यांना जनतेच्या प्रश्नांची जाण आहे.

प्रश्न सोडविण्याकडे त्यांचा कल असतो. असा नेता भाजपमध्ये असला पाहिजे, यामुळे त्यांना भाजपात घेण्यासाठी आपण प्रयत्न करणारच, ्सं चंद्रकांत पाटील म्हणाले. ते अपक्ष खासदार असल्याने ते भाजपमध्ये थेटपणे प्रवेश करू शकणार नाहीत. त्यांना भाजपचे सहयोगी म्हणून यावे लागेल. परंतु त्यांनी भाजपमध्ये यावे, ही माझी प्रामाणिक भावना आहे, असे चंद्रकांत पाटील म्हणाले.

सांगली लोकसभेच्या तिरंगी लढतीत अपक्ष म्हणून विशाल पाटील निवडून आले. महाविकास आघाडीचे अधिकृत उमेदवार चंद्रहार पाटील असतानाही काँग्रेस पक्षाने पडद्यामागून विशाल पाटील यांचे काम करून त्यांना निवडून आणलं. त्याच विशाल पाटील यांना मंत्रिपदाचे वेध लागलेत. त्यासाठी त्यांनी पक्षबदलाची तयारी देखील दर्शवलीय. त्यामुळे भाजपचे नेते चंद्रकांत पाटील त्यांचा भाजपमध्ये प्रवेश करून घेण्यास इच्छुकआहेत.