मोदी सरकारच्या मंत्रिमंडळ विस्तार होण्याची चर्चेनंतर आता राज्य सरकारच्या मंत्रिमंडळाचा विस्तार होणार असल्याची चर्चा सुरू झालीय. मंत्रिमंडळ विस्तारासह महायुती सरकारमध्ये मोठी खांदेपालट सुद्धा होणार असल्याचं म्हटलं जातंय. शिवसेना शिंदे गटाचे नेते, आमदार बच्चू कडू यांनी याबाबत गोप्यस्फोट केलाय. आमदार बच्चू कडू जळगाव दौऱ्यावर आहेत, त्यावेळी त्यांनी मंत्रिमंडळ विस्ताराचा दावा केलाय. (Maharashtra cabinet expansion after Diwali 2026 Bachchu Kadu statement)

बच्चू कडू यांच्या दाव्यामुळे राजकीय वर्तुळात मंत्रिमंडळ विस्तार तसेच संभाव्य खांदेपालटाच्या चर्चांना पुन्हा एकदा उधाण आलंय. "दिवाळीत किंवा दिवाळीनंतर राज्यात मंत्रिमंडळ विस्तार आणि मोठा खांदेपालट होण्याची शक्यता बच्चू कडू यांनी वर्तवलीय. याचवेळी बच्चू कडू यांनी मुख्यमंत्र्यांनी अडीच-अडीच वर्षांचा शब्द दिला होता अशी आठवणही त्यांनी करून दिली. मात्र बच्चू कडू यांनी अडीच-अडीच वर्षांचा शब्द नेमक्या कोणत्या मुद्यासाठी होता? कोणत्या मंत्रिपदाच्या अनुषंगाने आहे, याबाबत चर्चा सुरू झालीय.

जळगाव दौऱ्यावर असलेल्या बच्चू कडू यांनी आमदार किशोर पाटील यांच्या मंत्रिपदाची मागणी केली. "जळगाव जिल्ह्यातून किशोर आप्पांना मंत्रिमंडळात स्थान मिळालेच पाहिजे. हवे तर जिल्ह्यात दोन मंत्रिपदे ठेवा, पण आप्पांना मंत्री करा. किशोर पाटील हे सलग तीनवेळा आमदार म्हणून निवडून आलेत. त्यामुळे त्यांच्या कार्यकर्त्यांना आणि मतदारसंघातील जनतेला त्यांना मंत्रिपद मिळावे असे वाटणे अत्यंत स्वाभाविक असल्याचे बच्चू कडू म्हणालेत. किशोर पाटील यांच्या मंत्रिपदासाठी उपमुख्यमंत्री एकनाथ शिंदे यांच्याकडे जोर लावू असेही कडू यावेळी म्हणाले.