सचिन बनसोडे, साम टीव्ही

अहिल्यानगर: कोपरगावमध्ये महायुतीत बिघाडी झाल्याच बघलायला मिळतंय. नगरपरिषद निवडणुकीसाठी भाजप आणि राष्ट्रवादी अजित पवार गटाकडून स्वतंत्र उमेदवार जाहीर करण्यात आले आहेत. भाजपकडून नगराध्यक्ष पदासाठी पराग संधान यांना उमेदवारी जाहीर केली आहे. तर राष्ट्रवादीने ओमप्रकाश उर्फ काका कोयटे यांना नगराध्यक्ष पदाचा उमेदवार म्हणून घोषित केले आहे.

अहिल्यानगर जिल्ह्यातील कोपरगावगावमध्ये काळे आणि कोल्हे या कारखानदारांमधील राजकीय संघर्ष सर्वश्रुत आहे. वरिष्ठांच्या आदेशाने युतीचा धर्म पाळत भाजपच्या स्नेहलता कोल्हे यांनी विधानसभा निवडणुक लढवली नव्हती. त्यामुळे विधानसभेला राष्ट्रवादी अजित पवार गटाचे आशुतोष काळे यांनी दणदणीत विजय मिळवत एक लाखाहून अधिक मताधिक्य घेतले होते.

मात्र नगरपरिषद निवडणुकीत स्नेहलता कोल्हे यांचे पुत्र विवेक कोल्हे आणि विद्यमान आमदार आशुतोष काळे यांनी एकमेकांविधात दंड थोपटले आहेत. कोल्हे यांनी समर्थकांचा मेळावा घेत भाजप आणि इतर मित्र पक्षांच्या वतीने नगराध्यक्षपदासह नगरसेवक पदाचे उमेदवार घोषित केले आहेत. तर आमदार आशुतोष काळे यांनी देखील समर्थकांचा मेळावा घेत राष्ट्रवादीकडून नगराध्यक्ष पदाचा उमेदवार घोषित केलाय.

एकीकडे महायुतीचे वरिष्ठ नेते पालिका आणि स्थानिक स्वराज्य संस्था निवडणुक एकत्र लढवण्याची भाषा करत असताना दुसरीकडे कोपरगावमध्ये भाजप आणि अजित पवारांच्या राष्ट्रवादीने स्वतंत्र सुभा मांडला आहे. त्यामुळे कोपरगावमध्ये भाजप आणि राष्ट्रवादी या दोघांमध्ये काटे की टक्कर होणार? की दोघांच्या भांडणात पुन्हा तिसऱ्याचा लाभ होणार? हे बघणं महत्त्वाचं ठरणार आहे.