मत चोरीच्या मुद्द्यावरून राष्ट्रवादी शरद पवार गटाचे आमदार जयंत पाटील यांनी जत विधानसभेचे आमदार गोपीचंद पडळकरांवर अप्रत्यक्षपणे सणसणीत टीका केली. 'स्वत:च्या नसून दुसऱ्या भागातून ४० ते ५० हजार मतांनी निवडून येणं शंकास्पद आहे. निवडणुकीचे निकाल खरे आहेत का? असा प्रश्न निर्माण होतो', असं जयंत पाटील म्हणाले होते. जयंत पाटील यांनी केलेल्या टीकेवर भाजप आमदार गोपीचंद पडळकर यांनी प्रत्युत्तर दिलं आहे. 'हिंमत असेल तर, जयंत पाटलांनी राजीनामा देऊन निवडणूक लढवावी', असं ते म्हणाले.

भाजप आमदार गोपीचंद पडळकर यांनी राष्ट्रवादी काँग्रेस शरद पवार गटाचे माजी प्रदेशाध्यक्ष जयंत पाटील यांना प्रत्युत्तर देत खूलं आव्हान दिलं आहे. 'जयंत पाटलांनी आपल्या आमदारकीचा राजीनामा देऊन इस्लामपूर मतदारसंघातून पुन्हा निवडणूक लढवावी. त्यांच्याविरोधात त्यांच्याच मतदारसंघात आपण निवडणूक लढवायला तयार आहे', असं ओपन चॅलेंज आमदार पडळकर यांनी दिला आहे.

'जयंत पाटील हिंदू विरोधी आहेत', असा घणाघाती आरोपही पडळकरांनी लगावला. 'जयंत पाटील आमदारकीचा राजीनामा देणार नाहीत आणि निवडणूक देखील लढवणार नाहीत, कारण त्यासाठी हिंमत लागते', असा टोला देखील गोपीचंद पडळकरांनी जयंत पाटलांवर लगावला.

जयंत पाटील यांनी मतचोरीच्या मुद्द्यावरून गोपीचंद पडळकरांवर टीकेचे बाण सोडले होते. जयंत पाटील यांनी केलेल्या टीकेवरून गोपीचंद पडळकर यांनी जयंत पाटलांवर हा जोरदार पलटवार केला आहे. ते सांगलीच्या कवठेमंकाळ या ठिकाणी भाजपाचे किसान सेलचे प्रदेशाध्यक्ष संदीप गिड्डे यांच्यावतीने आयोजित दोस्ती दहीहंडी सोहळ्याच्यानिमित्ताने बोलत होते.

पडळकरांनी केलेल्या पलटवारावर जयंत पाटील काय प्रत्युत्तर देणार, हे पाहणं महत्वाचं असणार आहे. दरम्यान, जयंत पाटील आणि गोपीचंद पडळकर यांच्यात सुरू असलेल्या मतचोरीच्या मुद्द्यावरील वादामुळे राजकीय वर्तुळात खळबळ उडाली आहे.