पराग ढोबळे, साम टीव्ही, प्रतिनिधी

Maharashtra : कन्नड मतदारसंघाचे माजी आमदार हर्षवर्धन जाधव यांना न्यायालयाने एका वर्षाची कारावासाची शिक्षा सुनावली आहे. सरकारी कामामध्ये अडथळा आणण्याच्या प्रकरणात दोषी आढळल्याने हर्षवर्धन जाधव यांना जिल्हा सत्र न्यायालयाद्वारे शिक्षा सुनावण्यात आली आहे. जाधव यांच्याविरुद्ध अटक वॉरंटदेखील जारी करण्यात आला होता.

६ डिसेंबर २०१४ रोजी शिवसेना पक्षप्रमुख उद्धव ठाकरे यांची हॉटेल प्राइडमध्ये शिवसेना पक्षातील नेत्यांसोबत बैठक सुरु होती. या बैठकीस आत जाऊ देण्यास मज्जाव केल्याने हर्षवर्धन जाधव यांनी पोलीस निरीक्षक पराग जाधव यांच्या कानशिलात लगावली होती. या प्रकरणी सोनेगाव पोलीस ठाण्यात गुन्हा दाखल करण्यात आला होता.

शासकीय कामात अडथळा आणणे आणि पोलीस कर्मचाऱ्याला मारहाण करणे या प्रकरणी न्यायालयाने हर्षवर्धन जाधव यांच्या विरुद्ध अटक वॉरंट जारी केला होता. वॉरंट निघाल्यानंतरही न्यायालयात हजर न राहिल्याने जाधव यांच्या विरोधात नॉन बेलेबल वॉरंट काढण्याचे न्यायालयाने आदेश दिले होते. १७ फेब्रुवारी रोजी न्यायालयात हजर झाल्यानंतर त्यांची कारागृहात रवानगी करण्यात आली होती. त्याच प्रकरणाचा आज (६ ऑगस्ट) निकाल लागला आहे. या प्रकरणात शासनातर्फे ॲड. चारुशीला पौनिकर यांनी आणि हर्षवर्धन पाटील यांच्या बाजूने ॲड. प्रकाश जयस्वाल यांनी युक्तिवाद केला.

तत्कालीन शिवसेना पक्षाचे माजी आमदार आणि आता शिंदे गटात असलेले हर्षवर्धन जाधव हे कन्नड (छत्रपती संभाजीनगर) विधानसभेचे माजी आमदार आहेत ते केंद्रीय मंत्री रावसाहेब दानवे यांचे जावई आहेत. विधानसभा निवडणुकीत जाधव यांनी अर्ज दाखल केला होता. हर्षवर्धन जाधव यांचा पराभव त्यांची पूर्वाश्रमीची पत्नी संजना जाधव यांनी केला होता.