Summary -

• साताऱ्यात भाजपच्या ‘ऑपरेशन लोटस’ मोहिमेला यश

• कराडच्या माजी नगराध्यक्षा शारदा जाधव यांचा भाजपमध्ये प्रवेश

• ४ माजी नगरसेवकांचाही भाजपमध्ये प्रवेश

• साताऱ्यात भाजपची ताकद वाढली

साताऱ्यामध्ये भाजपच्या ऑपरेशन लोटसला यश मिळाले आहे. भाजपने अनेक बड्या नेत्यांना आणि माजी नगरसेवकांना फोडले असून या सर्वांनी भाजपमध्ये प्रवेश केला. त्यामुळे आगामी स्थानिक स्वराज्य संस्थांच्या निवडणुकीपूर्वी साताऱ्यामध्ये भाजपची ताकद वाढली आहे. भाजपा प्रदेशाध्यक्ष रवींद्र चव्हाण आणि मंत्री चंद्रकांत पाटील यांच्या उपस्थितीत मुंबईमध्ये या सर्वांनी भाजपचे कमळ हातामध्ये घेतलं.

मिळालेल्या माहितीनुसार, कराडच्या माजी नगराध्यक्षा शारदा जाधव यांनी भाजपामध्ये एन्ट्री केली. जनशक्ती आघाडीच्या चार माजी नगरसेवकांनी देखील शारदा जाधव यांच्यासोबत भाजपामध्ये पक्षप्रवेश केला. आमदार डॉ. अतुल भोसले यांच्या नेतृत्वाखाली या सर्वांनी भाजपामध्ये प्रवेश केला. भाजपा प्रदेशाध्यक्ष रवींद्र चव्हाण आणि मंत्री चंद्रकांत पाटील यांच्या उपस्थितीत मुंबईमध्ये आज हा पक्षप्रवेश सोहळा पार पडला.

माजी नगराध्यक्षा शारदा जाधव यांच्या प्रवेशामुळे कराडच्या राजकारणाची समीकरण बदलणार असल्याचे बोलले जात आहे. भाजपाची नगरपालिका निवडणुकीच्या पार्श्वभूमीवर मोठी बेरीज असल्याचे देखील म्हटले जात आहे. सातारा नगरपालिकेवर सत्ता मिळवण्यासाठी भाजपने कंबर कसली आहे. साताऱ्यात भाजपकडून आगामी निवडणुकीसाठी जोरदार तयारी केली जात आहे. अशातच या पक्षप्रवेशामुळे भाजपचं बळ आणखी वाढलं आहे.

दरम्यान, नंदुरबारमध्ये देखील भाजपची ताकद वाढली आहे. माजी खासदार डॉ. हिना गावित या आज भाजपमध्ये प्रवेश करणार आहेत. हिना गावित यांच्या घरवापसीमुळे भाजपला आगामी निवडणुकीत फायदा होणार आहे. प्रदेशाध्यक्ष रवींद्र चव्हाण यांचा उपस्थितीत हिना गावित यांचा भाजपमध्ये प्रवेश होणार आहे. त्यांच्यासोबत अनेक पदाधिकारी आणि कार्यकर्ते हे देखील भाजपचे कमळ हाती घेणार आहेत.