शिंदे गटाच्या शिवसेनेनंतर भाजप उद्धव ठाकरेंना धक्का देणार आहे. नाशिकमध्ये ठाकरे गटाला मोठा धक्का बसणार आहे. येथील ठाकरे गटाचा मोठा नेता पक्षाची साथ सोडणार आहे. गेल्या काही दिवसांपासून ठाकरे गटातून मोठ्या प्रमाणात ऑउटगोइंग सुरू आहे. जागोजागी पदाधिकाऱ्यांनी पक्षाला सोडचिठ्ठी दिलीय. आता नाशिकमध्ये शिंदे गटानंतर भाजप ठाकरे गटाला धक्का देणार आहे.

येथील माजी आमदार हाती कमळ घेणार असल्याची चर्चा राजकीय वर्तुळात होत आहे. माजी आमदार अनिल कदम लवकरच भाजपमध्ये प्रवेश करणार असल्याचं सांगितलं जात आहे. मागील २ निवडणुकीत अनिल कदम यांनी सलग विजय मिळवला होता. इतका ताकदवान नेता उद्धव ठाकरेंची साथ सोडणार असल्याने ठाकरे गटाला नाशिकमध्ये मोठा धक्का असल्याचं म्हटलं जात आहे.

अनिल कदम हे कार्यकर्त्यांसह भाजपमध्ये प्रवेश करणार आहेत. विधानसभा निवडणुकीत उद्धव ठाकरे गटाला फटका बसला. २०१९ च्या निवडणुकीत ५६ जागा निवडून आणणाऱ्या उद्धव ठाकरेंना २०२४ च्या निवडणुकीत केवळ २० जागांवर समाधान मानावं लागलं. निवडणुकीच्या निकालापासून ठाकरे गटाला गळती लागलीय. अनेक माजी आमदार, नगरसेवक, पदाधिकाऱ्यांनी पक्षाची साथ सोडलीय.

अनेकांनी शिंदे गटात प्रवेश केलाय. एकनाथ शिंदे यांच्या शिवसेनेकडून ठाकरे गटाला वारंवार धक्के देत आहेत. निफाडचे माजी आमदार अनिल कदम यांचा प्रवेश करून घेत भाजपही ठाकरे गटाला धक्का देणार आहे. निफाडचे माजी आमदार अनिल कदम हे त्यांच्या समर्थक आणि कार्यकर्त्यांसह भारतीय जनता पक्षात प्रवेश करणार असल्याचं सांगितलं जात आहे.

कोण आहेत अनिल कदम?

अनिल कदम हे २००९ आणि २०१४ साली निफाड विधानसभेतून आमदार म्हणून निवडून आले होते. शिवसेनेचे एकनिष्ठ नेते म्हणून त्यांना ओळखले जातं. २०२२ साली एकनाथ शिंदे यांनी बंड केला तेव्हा त्यांनी ठाकरेंसोबत राहणं पसंत केलं. निफाड तालुक्यात अनिल कदम यांचा जनसंपर्क मोठा आहे. सुशिक्षित नेते म्हणून त्यांच्याकडे पाहिले जातं. परंतु अनिल कदम यांना त्यांच्या घरातूनच आव्हान आहे.

त्यांचे चुलत बंधू यतीन कदम हे त्यांचे विरोधक मानले जातात. २०२४च्या विधानसभा निवडणुकीत अनिल कदम यांचा पराभव झालाय. अनिल कदम यांनी महाविकास आघाडीकडून निवडणूक लढवली होती. या निवडणुकीत राष्ट्रवादीचे दिलीप बनकर विजयी झाले. २००९ साली शिवसेनेच्या अनिल कदमांना ९० हजार ६५ मते तर राष्ट्रवादीच्या दिलीप बनकर यांना ५६ हजार ९२० मते मिळाली होती. २०१४ मध्येही कदम विरुद्ध बनकर सामना झाला. त्यात अनिल कदमांना ७८ हजार १८६ मते तर दिलीप बनकर यांना ७४ हजार २६५ मते मिळाली होती.