मागील ३७ वर्षांपासून शिवसेनेशी एकनिष्ठ असलेले त्र्यंबक तुपे यांनी आज शिंदे गटाचे धनुष्यबाण हाती घेतले. हा पक्षप्रवेश ठाकरे गटासाठी मोठा धक्का मानला जात आहे. आता ठाकरे गटाला आणखी एक धक्का बसल्याची माहिती समोर आली आहे. माजी आमदार शिवाजी चौथे यांनी ठाकरे गटातील पदाचा राजीनामा दिला आहे.

जालना जिल्ह्यातील अंबड मतदारसंघाचे माजी आमदार आणि ठाकरे गटाचे विद्यमान सहसंपर्कप्रमुख शिवाजी चौथे यांनी ठाकरे गटातून बाहेर पडण्याचा निर्णय घेतला. शिवसेनेशी चाळीस वर्षे एकनिष्ठ असलेल्या शिवाजी चौथे यांच्या राजीनाम्यामुळे शिवसेना ठाकरे गटाचे मोठे नुकसान झाले आहे. त्र्यंबक तुपे यांच्या प्रमाणे शिवाजी चौथे देखील शिंदे गटात प्रवेश करणार असल्याची चर्चा सुरु आहे.

'चाळीस वर्षांपासून शिवसेनेमध्ये विविध पदांवर काम करण्याची संधी मिळाली. या माध्यमामधून जनतेचे अनेक प्रश्न सोडण्याचा मी प्रामाणिक प्रयत्न केला. शिवसेना प्रमुख बाळासाहेब ठाकरे आणि उद्धव ठाकरे यांचा स्नेह, प्रेम नेहमीच माझ्या पाठीशी राहिले. याबद्दल मी त्यांचा मनापासून आभारी आहे. वैयक्तिक कारणांमुळे मी शिवसेना पक्षातील सहसंपर्कप्रमुख पदाचा आणि पक्षातील प्राथमिक सदस्यत्वाचा राजीनामा देत आहे', असे माजी आमदार शिवाजी चौथे यांनी म्हटले आहे. राजीनामा दिल्यानंतर शिवाजी चौथे हे शिंदे गटात प्रवेश करणार असल्याच्या चर्चा रंगल्या आहेत.